Ahmet Guno ke sey zerrîwazî Şirnexî ra semedê hetkarîya mexdûranê erdlerzî ameyo Semsûr ANFyî rê qisey kerd.

Ahmet Gunî vat: ''Gama ke ez dekewte bajarî mi ferq kerd ke felakete senî gird a. Bajar serûbin bibi. Nê zerrîya mi dejna. Bitaybetî hela ke mi dî şar bi îmkananê xo keno ke merdimanê xo bixelisno û birînanê xo bipêşo, ez zaf qehrîyaya. Mi tîya dewlete nêdî. 

Semsûr de bajaro rijîyaye û şaro şikte, mi dî. Serhadî ra heta Amedî şar semedê paştîdayîşî ameyêne. Mi tîya hetkarîya qicanê kurdan dîye. Kesê ke binê rijnayîşî de mendî ê zî kurd bî, înanê ke ê xelisnayêne, ê zî kurd bî. Mi pawitêne ke tîya dewlete zerrîwazîyan rede bixebito la eksê nê bi.

Ma semedê hetkarîya şarê xo tîya de yê, çîyo ke destê ma ra yeno ma do bikerê. Wa şarê ma hetkarî bişawo. Kesê ke banê înan rijîyayî hewcedarê zaf çîyî yê. Coka ganî her hetî ra hetkarî bêro kerdene. Wextê paştîdayîşê madî û manevî yo.''