Serê medyaya sosyale de seba serrgêra 19’ê Temmuze eleqedarîyêka zafe

Seba serrgêra 7’ine ya Şorişê Rojawanî ke 19’ê Temmuz a 2012’î de dest pêkerd, kampanyaya Torê Rojawanî yê Global RISEUP’î ya ke serê medyaya sosyale de bi nameyê #pirozbe / #riseup4rojava daye destpêkerdene zaf bale ante.  

Şorişê Rojawanî 19’ê Temmuze 2012 de bajarê Kobanê yê Rojawanê Kurdistanî de dest pêkerdibi û bi leze Efrîn, Qamişlo û Dêrike û bajaranê bînan de vila bibi. Bi wesîleya serrgêra 19’ê Temmuze, Torê Rojawanî yê Global RISEUp’î veng dabi şuxulnayoxanê înternetî ke seba Şorişê Rojawanî pîroz bikerê, vîde, fotograf û peyaman pare bikerê.

Kampanyaya ke Îne serê torê medyaya cimatkîye de bi nameyê “#pirozbe û #riseup4rojava dest pêkerde, xeylî bala şuxulnayoxanê înternetî ante. Kampanyaya ke serê Twîtterî û Facebookî de dest pêkerde, şuxulnayoxanê medyaya sosyale eleqedarê şorişê Rojawanî fotograf û qewimîyayîşê Rojawanî pare kerdî.

 Zafaneyê şuxulnayoxan bi vatişê, “Seba 7 serranê xoverdayîş û azadîye” dest bi parekerdişanê xo kerd û bale ante serê mucadeleyê şarê Rojawan û Vakurê Sûrîye ke 2012 ra nata sere de hemverê DAÎŞ’î de, hemverê hêzanê îşxalkaran de xover danê. Heman wextî de ame vatene şorişê Rojawanî şorişê cinîyan o û ekolojîst o. Parekerdişan de kîşta Kurdkî de bi Îngilîzkî, Almankî, Franskî, Îspanyolkî, Tirkî û Îtalyankî xeylî çîyî ameyî parekerdene, fotografê şerwananê şehîdan ê YPG/YPJ’yî ameyî parekerdene.

 Torê Rojawanî yo Global xeylî sendîka û organîzasyonan ra yeno pê. Mîyanê nînan de sendîkaya anarşîste CNT, a komunîste CGT, Rete Kurdistan Îtalîa, têgêrayîşê Almanya yo antîfaşîst Antîfa, organîzasyonê Rojawanî, Yewîya Wendekaranê Kurdistanî YXK û Tatort Kurdistan estê.