SETA Kurdê ke Ewropa de yê zî kerdê hedef!

Organîzasyonê ajanîye yê dewleta Tirkî SETA, vero ke organanê medya yê xerîban ê ke Tirkîya de yê hedef bigêro, sazîyê Kurdan ê Ewropa hedef girewtî. Kurdî xo amade kenê ke xeylî welatanê Ewropa de bikewê mîyanê cehdanê huqûqîyan.  

Gama merdim ewnêno qismê pêşkêşî yê SETA ra xo sey sazîyêka afernayîşê hayîdarîya zanistî pêşkêş kena. Pratîk de afernayîş yan zî cigêrayîşê ‘hayîdarîyanê zanistîyan’ bi hawayê ‘pêşkêşkerdişê hayîdarîya îstîxbaratî’ ya seba rejîmêkê zordarî xo ramojneno. Hayîdarîya îstîxbaratî zî hem eşkena hedef ramojno û hem zî eşkena rayîrê kişîyayîşê merdiman akero. Nê çîyî zî SETA kenê wasitayêka bitehluke ya îstîxbaratî.

 Raporê “Dimeyê Sazîyanê Medyaya Mîyanneteweyîye yê Tirkîya” ke peynîya hewteyî de hetê SETA ra ame weşanayene bi sebebê razînêbîyayîşêkê pîlî. Sazîyanê medya û organîzasyonanê rojnamekaran ê ke rapor de hedef ameybî ramotene razînêbîyayîşê xo ard ziwan û eşkera kerd ke rapor seba ‘hedefgirewtişî’ ameyo amadekerdene.

 12 Welatan de Bi Pêroyî 24 Mengî Kurdî Ameyê Şopnayene

Heman sazîye verê nê raporî bi sernameyê “Organîzebîyayîşê PKK’yî yê Ewropa” xeylî welatanê Ewropa de komele û sazîyê medyaya şarê Kurdî kerdîbî hedef.

Îdarekarê SETA heme sey merdimê nizdê rejîmê AKP’yî yenê naskerdene. Koordînatorê ci yo pêroyî heman wextî de nûştoxê Rojnameya Sabahî Prof. Bûrhanettîn Dûran o ke no rojname sey vervatoxê rejîmê AKP’yî yeno naskerdene. Çele ya 2018’î de mabênê weqfê SETA û Anadolû Ajansi de rasterast rejîmê AKP’yî rê girêdaye protokolêkê hemkarîye amebi amadekerdene.

Raporo ke Kurdî hedef ramotî goreyê SETA netîceyê cigêrayîşêkê 24 mengan de ameyo amadekerdene. 12 welatan de bi rayîrê xebatanê îstîxbaratî tena Kurdî nê, heman wextî de rojnamekar, sazî û şexsîyetê Ewropayijî yê ke têkilîya înan Kurdan dir esta zî bi fotograf û adresanê xo ameyî pêhesnayene. Raporo ke kerdo kitab, tede organîzasyonê cimatkîyî yê sivîlan ê Kurdan bi hawayê “Organîzebîyayîşê sazîya cimatkî ya sivîle ya PKK’yî ya Ewropa” hedef ameyê ramotene. 

Cigêrayîşo Zanistî yo, Yan Şaxê Îstîxbaratî yê MÎT’î yo?

SETA ke îdîa kena ‚hayîdarîyanê zanistîyan‘ arê dana, bi nê vatişan bi hawayêkê eşkerayî tayê parlementeranê Ewropayijan kena hedef, „Yeno dîyene ke sîyasetmedarê nizdê PKK’yî rixmo ke tewrê çalakîyanê sûcî benê derheqê înan de cipersayîş nêameyo destpêkerdene, zafane xelate ameya dayene. Mesela no sîyasetmedar tewrê xeylî çalakîyanê PKK’yî bîyo, la nê kombîyayîşî çarçewaya heqê nûmayîşî û kombîyayîşî yê demokratîkî de ameyê ercnayene. Eke parlementerêk tewrê kombîyayîşêkê sazîyêka DAÎŞ’î bibo yan zî propagandaya DAÎŞ’î bikero heman nizdbîyayîşo pozîtîf ci rê nêno ramotene. No hal citstandardî ya.“

Medyaya Ewropa zî Hedef de ya

Pîya HDK, Komeleyê Êzidîyan, komeleyê Elewîyan, Cimatê Îslamî yê Kurdistanî, xebatê kultur û hunerî, sazîyê merdimîye, rojnamekar û kovaran, seba kanalê hemparî yê Alman û Fransa ARTE zî yeno vatene, „Organîzasyonî sey organîzasyonêko modern o ke seba azadîye mucadele keno pêşkêşê rayapêroyîye ya rojawanî keno.“ Rapor de xeylî sazîyê medyaya Ewropa, partîyê çepî, parlementer û temsîlkarê organîzasyonanê cimatkîyan yê sivîlan ê ke Ewropa de yê seba ke paştî dayê Kurdan hedef ameyê ramotene. Nê heme zî bi fotografan rapor de ca gênê.

Kurdî do Hemverê Nê de Bikewê Cehdanê Huqûqîyan Mîyan

Goreyê hayîdarîyanê ke çimeyanê Kurdan ê Fransa, Almanya, Belçîka û xeylî welatanê bînan ra amîya girewtene, Kurdî do hemverê raporê SETA yo ke hedef ramojneno de bikewê mîyanê cehdanê huqûqîyan. Tena sazî nê, heman wextî de bi seyan kesê ke komeleyan de, çalakîyanê kuçeyan de, konferansan de ameyê têhet û fotofrafê înan ameyê dayene û bi nê hawayî asayîşê cuya înan kewto tehluke zî do seba pawitişê heqê xo yê cuye muracatê rayîranê huqûqîyan bikerê. Na yewe ra yeno pawitene ke hem bi hawayêkê sazî hem zî bi hawayêkê şexsîyî do cehdê huqûqîyî hemverê SETA de dest pê bikerê.