Çalakîyan roniştişî ya ke kurdan vera tecrîdê serê Rayberê Şarê Kurdî Abdullah Ocalanî bajarê Strasbourgî yê Fransa de verê Konseya Ewropa de daye destpêkerdene, bi eşkerayîya çapemenîye ameye temamkerdene.

Avûkate Selma Benkhelifa ke çalakîye de qisey kerd nê vatî: ''Tirkîya goreyê qeraranê dezgehanê Ewropa tênêgêrena. Ganî semedê qedînayîşê tecrîdî ma çîyêk bikerê. Xeyrê îdeolîjya Abdullah Ocalanî ewro Îran, Îraq û Tirkîya de şar serewedarano.''

Avûkate Joke Callewaert vat: ''Ganî sîyasîyî qeraranê edaletî bîyarî ca. Mehkemeya Heqanê Mediman a Ewropa di reyî vat ke ganî Abdullah Ocalan binê tecrîdê giranî de memano. La Tirkîya nê qerarî nêana ca. Ma tîya ameyî têhet ke qerarê ke derheqê Tirkîya de ameyî girewtene wa bêrê caardene.''

Endamê Konseya Rayberişî ya KCKyî Zubeyîr Aydar zî azadîya Abdullah Oclanî sey azadîya heme kurdan name kerd û vat: ''Wayîrvejîyayîşê  Rayberîye wezîfeyêko ehleqî, sîyasî û polîtîk ê ma pêrun o. Heta azadîya Rayber Apoyî têkoşînê ma do dewam bikero.''

Reyna qiseykerdoxanê bînan zî bale ante muhîmîya rolê Abdullah Ocalanî ser û vat ganî semedê şiknayîşê tecrîdî têkoşîn bêro xurtkerdene. Eşkerayîye de veng dîya CPT û dezgehanê eleqedaran ê Ewropa ke wa vera tecrîdî wezîfeyê xo bîyarê ca.