Paytextê Swêdî Stockholm de bi hezaran kurdîstanij û swêdijî vera dewleta tirke û vera endamîya NATOyî ya Swêdî ke pê bazarîya kurdan ameye kerdene, vejîyayî waran.

Çalakîye hetê Komîteya Rojawanî, grûbanê vera NATOyî, Partîya Heq û Sosyalîstan, Partîya Çepe û Merkezê Komelê Demokratîkî yê Kurdan ê Swêdî ra ameye ekrdene. Rayraşîyayîşo ke Parka Norra Bangtorgetî de destpê kerd heta meydanê Medborgarplatsenî dewam kerd.

Rayraşîyayîş de sloganê sey ''NATOyî rê nê'', "Jin jiyan azadî", ''Kiştox Erdogan'', ''Abdullah Ocalanî rê azadîye'' ameyî eştene. Wextê rayraşîyayîşî de yew beyraqa girde ya PKKyî pirdêkî de ameye daliqnayene.

Çalakîye de xeylêk dezgeh û rêxistinan mesajê xo dayî. Eşkerayîya bi nameyê merkezê kurdan de zî bale ameye antene tecrîdê vera Rayberê Şarê Kurdî Abdullah Ocalanî û hêrişê dewleta tirke yê vera Herêmanê Pawitişî yê Medya ser ke çekê kîmyewîyî yenê şuxulnayene. Qiseykerdişê bi nameyê Partîya Çepe de zî endamîya NATOyî ya ke pê bazarîya kurdan ameye kerdene û hemkarîya bi Erdoganî ameyî şermezarkerdene û ame vatene ke ê do verê sîyasetê emperlîyalîstî de milê xo çewt nêkerê. Badê rayraşîyayîşî zî qiseykerdişî ameyî kerdene û veng dîya Swêdî ke wa hemkarê sûcanê dewleta tirke mebo.