Erdlerzî ra dima zaf cayanê Tirkîya ra hetkarîyî seba mexdûranê erdlerzî ameyî erşawitene. Ê cayan ra yew Taxa Gazî ya Îstanbulî ya ke zafîya na taxe kurd û elewî yê.

Waştişê şarî

Zerrîwazanê hetkarîyî dîyar kerd ke demêkê kilmekî de cewabê vengdayîşê şar ê hetkarî ame dayene û 3 rojanê verênan de 31 tirî hetkarîyî Taxa Gazî ra ameyî erşawitene û vat ke hewcedarîya her çîyî est bîyî. Êyê ke ameyî arêdayene, erşawîyayê.

Xeylê însanan koçê taxe kerd

Zerrîwazan dîyar kerd ke 3 rojanê verênan ra dima xeylê însanan koçê taxe kerd. Zerrîwazan vat ke hûmara keyeyan ke ameyî tîya, 50î ra vêşêr a, yanî tewr tay 250 kesî ameyî taxe. Zafîya ê kesan ke koçê tîyayî kerda, kurd, ereb û elewî yê.

Bawerî bi dewlete çin a

Zerrîwazan ard ziwan ke, mexdûrê erdlerzî ke koç kerdî, êdî bawerîya înan bi dewlete çin a. Ê nêfikirênê ke agêrê û bawerîya înan bi awanîyanê neweyan zî çin a. Zerrîwazan dîyar kerd ke seba ke dewlete karê xo rind nêkena zaf kar milê zerrîwazan de maneno.