Hemserekê Pêroyî yê HDP’yî Sezaî Temellîyî ard ziwan ke seba weçînayîşê Stenbolî yê 23’ê Hezîrane tercîhê înan zelal o û vat, “Ma wazenê 23’ê Hezîrane de sindoqan ra demokrasî, haşitî û muzakere vejîyê.”
Hemserekê Pêroyî yê Partîya Şaran a Demokratîke (HDP) Sezaî Temellî, Otêla Taksîm Hîllî ya Beyogluyî de, xebatkaranê çapemenîye reyde ame têhet. Parlamenterê HDP'yî Mehmet Tiryakî û Endama Meclîsê HDP’yî Aylîn Hacaloglu zî kombîyayîşî de amade bîyî.
Temellîyî derheqê weçînayîşê Stenbolî yo ke 23’ê Hezîrane de do dubare bibo de qisey kerd û vat, “Weçînayîşî rê wexto ke zaf kilm mend. Munaqeşeyê weçînayîşî hîna dewam kenê. Zextê serê HDP’yî zî dewam kenê. Her kes zaneno heme munaqeşeyî serê HDP’yî ra yenê kerdene. Serê HDP’yî de ambargoyê medya esto. Ma wazenê welîyê wendekaran zî nê weçîyayîşî de kar bigêrê vileyê xo. Ma weçînayîşê 23’ê Hezîrane de karneya serdestan bidê înan. No weçînayîşê demokrasî yo. Ma do bi têkoşînê xo yê heme wareyan Tirkîya newe ra awan bikerê.”
Temellîyî dewamê qiseykerdişê xo de vat, “Weçînayîşê 23’ê Hezîrane de tercîhê şarê ma zelal o. Ma vengdayîş heme weçînayoxan kenê û vanê ke, 23’ê Hezîrane de şima kotî benê wa bibê qetî şorê sindoqan ser û rayanê xo bidê. Şorê serê sindoqan ke sindoqan ra demokrasî, aşitî, muzakere vejîyê. Seba naye ma kedêk girde danê. HDP partîya sereke ya Tirkîya ya. Vera partîya ma propagandayayêk sîyaye esta. Ma partîya Tirkîya yê. Çunke pawitişê şaranê Tirkîya ma ra estê.”
