Hemserekê Partîya Şaran a Demokratîke (HDP) Sezaî Temellî temsîlkaranê organîzasyonanê karsazanê Amedî dir ronişt. Parlamenterê HDP’yî yê Amedî Îmam Taşçier, hemşaredarê Bajarê Girdî yê Amedî Selçûk Mizrakli, hemserekê HDP’yî yê Amedî Hulya Alokmen Ûyanike û Zeyyat Ceylan, serekê Odaya Sanayî û Tîcaretî ya Amedî (DTSO) Mehmet Kaya, serekê Meclîsê DTSO’yî Celalettîn Bîrtane, temsîlkarê Borsaya Tîcaretî ya Amedî (DTB) û organîzasyonê cimatkî yê sivîlî tewrê kombîyayîşî bîyî.

Serekê DTSO’yî Mehmet Kayayî vat xeylî muhîm o ke mabênê cimatê sivîlî yê herême û sîyasetî de heşêko hempar bêro awankerdene. Kayayî vat rolê HDP’yî yê demokratîkkerdişê Tirkîya xeylî muhîm o.

Temellîyî zî netîceyê weçînitişê cayîyî yê 31’ê Adare ard vîrî û bale ante serê muhîmîya heşê hemparî û vat Tirkîya de bê demokrasîyî tu problem hal nêbeno.

 Temellîyî vat ke reformê huqûqîyî sernameyanê qanûnê bingeyênî yê tewr muhîman ra yê û vat, “Tirkîya de hendî xeylî problemî bîyê kronîk. Zîndanan de nizdê 5 hezarî HDP’yijî estê. Heman wextî de rojnameger û akademîsyenî estê. Merdimî ca û wareyê xo ra ameyî vetene. Nika nizdê 500 hezar kesî bi şertê kontrolî teber de ciwîyenê. Na babete de rolê muhîmî kewenê serê milê cimatê sivîlî. Ma meclîsî de zî nê ardî ziwan. Meclîs binê kontrolî de yo. Polîtîkayê ekonomî yê şaşî, Tirkîya kerdê feqîrî. Problemê demokrasîyî, heman wextî de problemê ekonomî yê.”