Serekê Pêroyî yê Komelê Îslamîya Kurdîstanî (CÎK) Hafiz Ahmed Turhalliyî ard ziwan ke serranê qijan de zewijîyayîş pratîkê Îslamî de û ferasetê Îslamî de çin o.

Turhalliyî vat: ''Warê Îslamî de nêno qebulkerdene ke domanê kênayî bêrê zewijnayene. No zulmêko pîl o.''

Turhalliyî bale ante ser ke Weqfa Dîyanetî ya Tirkîya fetwa dana ke domanê kênayî yê 9 serrî û domanê lajî yê 12 serrî eşkenê bêrê zewijnayene û no raşt nîyo. Turhalliyî vat: ''Dezgehê sey Dîyanetî Îslamî texrîb kenê û xizmetê Îslamî nêkenê. Sûreya Nîsa ya Quranî de yeno vatene ke key merdimî bieşkê xo bidevirnê wa o çax bizewijê. Yanî key bieşkê mesuldarî bigêrê xo ser. Eke domanê kênayî qijîya xo de bêrê zewijnayene no zulm, cînayet û kiştiş beno.''

Turhalliyî da zanayene ke îqtîdaran Pêxemberî ra dima dîn seba menfaetanê xo şuxilnayo û vat: ''Verê Îslamê demokratîkî yeno girewtene. Dezgehanê sey Dîyanetî û îqtîdaran dîn kerd hacetê xo. Dewleta tirke ya kemalîste wayîra nê dezgehan vejîyena û înan pawena. Dîyanet seba sentezê Tirk-Îslamî mîyanê komelî de vila bibo û nijadperestîya tirkbîyayîşî awan biba ronîya. No dezgeh seba asîmîlekerdişê mezhebanê bînan est o. Dezgehê winayênî bi destê dewlete Kurdîstan de yenê rêxistinkerdene. Ganî komelê kurdan û dîndarî nînan ra hayîdar bibê