Hûmara vizêrînî yê rojnameyê Frankfurter Rundschau de, karê casûsîya MÎTê dewleta tirke ser o xeberêke weşanîya. Xebera Erkan Pehlîvanî de ame dîyarkerdene ke konsolosxaneyê  Dusseldorfî tora casûsîye de cayêkê muhîmî de yo û ame vatene ke agahîyê 8 bextwaştoxan ke hemverê rejîmê Erdoganî de yê, bi raya nê konsoloxxaneyî erşawîyayî Anqara rê.  

Goreyê detayanê ke derheqê serebûtê ajanîye de ma fînayî dest, ajanê MÎTî yo bi nameyê Arîf. A. yo ke qezaya Grevenbroichî ya Dusseldorfî de kampêka bextwaştoxan de gurîyeno, ey  agahîyê bextwaştoxan resnayî Konsoloxaneyê Tîrkîya yê Dusseldorfî.

Pêvînayîşê Arîf A.yî ra dima konsoloxaneyî belgeyî erşawitî mudurîyetê asayîşî yê Anqara. Hûmara telefon û yê nasnameyî yê Arîf A.yî ya dewleta tirkîya û sewbîna  hûmar û agahîyê taybetî yê 8 kesan ke hemverê serdestîya AKP-MHPyî de yê, belgeyan de ca gênê. Goreyê belgeyê ke 4ê kanûne 2020î de ameyê hazirkerdene aseno ke Arîf A. Casûsêkê MÎTî yo û serra 2024î ra heta nika şîrketêka asayîşî de xebitêno.

Yeno texmînkerdene ke nêzdîya 6 hezar casûsê MÎTê Tirkîya Almanya de est ê. Selahîyetdarê dewleta Almanya xeylê reyan ardo ziwan ke, seba sîyasetmedaranê kurdan hazirîya suîkastî yena kerdene, la reyna zî Almanya nê casûsan rê çimê xo girewtî.