Seba ke PKK ''lîsteya rêxistinanê terorî'' ya Yewîya Ewropa ra bêro vetene, warê mîyanneteweyî de 3 mîlyon îmzayî ameyî arêdayene û Komîsyonê Ewropa rê ameyî teslîmkerdene.

Îmzayê ke bi vengdayîşê Înîsîyatîfê Kurdan rê Edaletî yê Mîyanneteweyî  ameyî arêdayene, ewro Bruksel de bi nameyê înîsîyatîfî hetê Têgêrayîşê Haştîye yê Belçika (Vrede), Enternasyonalê Averperweran (Progressive International) û Rêxistina Hunerî ya Tîtikê Dinyaya Newî  (New World Summit) ra teslîmê Komîsyonê Ewropa bîyî.

Verî Meydanê Schumanî de eşkerayîya çapemenîye ameye kerdene. Wextê eşkerayîye de bi sloganan xoverdayîşê Rayberê Şarê Kurdî Abdullah Ocalan, tepişteyanê sîyasîyan û gerîlayan ame selamkerdene.

Serekê Partîya Çepe yê Ewropa Dr. Walter Baiero ke tewrê eşkerayîye bi, mesajê paştdayîşê şarê kurdî da û vat: ''3 mîlyon îmzayî ameyî arêdayene, ganî PKK lîsteyê terorî bêro vetene. Xora PKK rêxistina terorîste nê partîya şarê kurdî ya. Coka ganî cade na lîste ra bêro vetene.''

Enternasyonalê Averperweran ra Daniel Koopî vîst vîrî ke Palamentoyê Almanya qirkerdişê vera êzidîyan qebul kerd la PKKyo ke êzidîyî qirkerdişî ra xelisnayî xo vîra kerd. Koppî vat: ''Muzakereyê haştîye ganî PKKyî reyde bibê.''

Vrede ra Ludo de Brabanderî zî ard ziwan ke ê sey Têgêrayîşê Haştîye paştî danê ke wa PKK lîste ra bêro vetene û vat: ''Wextê ci yo ke Komîsyonê Ewropa waştişê wedaritişê qedexeyê vera PKKyî bieşnawo.''

Badê qiseykerdişan heyetêk belgeyê  3 mîlyon îmzayan o ke hetê noterî ra ameyo tesdîqkerdene teslîmê Komîsyonê Ewropa kerd.