Kongreya Demokratîke ya Şaran (HDK) do 29ê çeleyî de Kombîyayîşê Pêroyî yê 12. bikera. Hemvervatoxê HDKyî Cengîz Çîçekî derheqê babete de ANFyî rê qisey kerd.

Çîçekî ard ziwan ke ganî weçînayîşê 2023yî teyna seba eşkerakerdişê îqtîdarî nêrê ercnayene û vat: ''Seba hêzanê mîyanê dewlete zî nê weçînayîşî tarîxî yê. Tirkîya de îtîfaqê Cumhurî û Îtîfaqê Miletî est ê ke xo sey 'Tirkayetîya Keske' û 'Tirkayetîya Keske' cakerdo. Coka weçînayîşî do bibê fînalê hesabanê înan. Şerê mabênê nê wird îtîfaqan do bi xirabî yan zî bi holî tesîrê ameyoxanê Tirkîya bikero. Yanî nê weçînayîşî do qederê şaran dîyar bikerê.''

Çîçekî da zanayene ke HDP û HDKyî bi perspektîfê îtîfaqê bindestan dest pê rayraşîyayîşî kerdo û vat: ''Ma resayî a aste ke rayîro hîrêyîn awan kerd. No seba ma tecrubeyêko serkewte yo. Bêguman kêmasîyê ma est ê. La rixmê hende teda, zulm û zorbazîye zî ma payan ser de yê û ma tek hêz ê ke eşkenê qederê welatî dîyar bikerê. Îtîfaqê Kede û Azadîye rixmê tarîtîye zî bîyo hêvîya terefgîranê vurîyayîşî. Têkoşîno komelkî û sîyasî dormeyê rayîrê hîrêyînî de neçare yo ke têkoşînê şarî û komelî hîna bi rêxistin bikero û xo biresno raştîya polîtîke ya komelkî ya mende.''