Wekîlê HDPyî yê Îdirî Habîb Eksîkî derheqê tecrîdkerdişê Rayberê Şarê Kurdî Abdullah Ocalanî û Nobeta Edaletî de ANFyî rê qisey kerd.

Eksîkî ard ziwan ke îqtîdar Qanûnê Bingeyî binpay keno, tecrîdê Îmraliyî ferz keno û CPT zî ney peygoş keno. Eksîkî vat: ''Sîstemê tecrîdî yê Îmraliyî verê çareserîya meseleya kurdan de asteng o. Birêz Ocalan aktoranê bingeyînan ê çareserîya meseleya kurdan ra yew o. Coka tecrîdkerdişê ey astengîya tewr pîle ya vera haştîye yo. Wexto ke Îmraliyî reyde dîyalogî ameyêne kerdene herême û Tirkîya de aramîye est bîye, gonîye nêrijîyayêne. Coka ganî tecrîd cade bêro wedaritene û Ocalan de wa pêvînayîş bêro kerdene. Ganî heqê hêvîye bêro şinasnayene û Birêz Ocalan wa azad bibo.''

Eksîkî îfade kerd ke Nobeta Edaletî de armancê înan o bingeyî wedarnayîşê tecrîdî yo û vat: ''Ma armanc kenê ke tecrîd bêro wedaritene û heqê ke dest nîyayê ser wa bêrê teslîmkerdene. Ma nobete de venga Wezîrîya Edaletî danê ke wa wezîfeyê xo bîyara ca. 22 mengî yo Birêz Ocalanî ra û tepişteyanê bînan ra xebere nêna girewtene ke na zî rewşêka tehlukeyîn a. Nêbeno ke ma vera tecrîdî bêveng bimanê. Ganî sîstemê tecrîdî yê Îmraliyî biqedo û sere de heqê Ocalanî ganî heqê pêro tepişteyan bêrê dayene.''