Wekîlê HDPyî 20 rojî yo vera tecrîdê serê Rayberê Şarê Kurdî Abdullah Ocalanî Nobeta Edaletî kenê. Wekîlan Dîlane Dîrayet Taşdemîr, Kemal Bulbul, Omer Ocalan, Zeynel Ozen, Zuleyha Gulum, Kemal Pekoz û Ridvan Tûranî verê Meclîsî de eşkerayîye daye.

Wekîlê HDPyî yê Riha Omer Ocalanî vist vîrî ke Ocalan 24 serrî yo Îmrali de tecrîdkerde yo û 21 mengî yo tira xeberêke nêna girewtene. Ocalanî vat: ''Welat her hewayî mîyanê krîzanê giranan de yo. Îqtîdarê AKP-MHPyî xîret keno ke bi hêrişan komelî bêtesîr bikero. Ma bi zelalî vanê ke meseleya kurdan, meseleyê komelkî teyna pê metodanê demokratîkan çareser benê. La AKP rayîrê şaşî ser o şino. Tecrîd teyna vera Abdullah Ocalanî ney vera pêro komelî yeno kerdene. Ma nika tecrîdkerde yê, binê ablûqa de yê.

Tecrîd beno sebeb ke pêro krîzî xorinêr bibê. AKPyî şert û mercê çareserîya demokratîke werte ra wedaritî. Berê Îmraliyî abikerê. Tecrîd meseleyêka sîyasî û huqûqî ya. Ganî keye û avûkatî bieşkê pêvînayîşan bikerê. Seba caardişê nê heqê huqûqî ma do heta peynî seba awankerdişê demokrasî têkoşîn bikerê.''