Nobeta Edaletî ya wekîlanê HDPyî roja 26. de dewam kena. Wekîlî Şevîne Coşkun, Hasan Ozgûneş, Kemal Pekoz, Îmam Taşçier, Muazzeze Orhan û Mûrat Sarisaç tewrê çalakîye bîyî.

Wekîla HDPyî ya Mûşî Şevîne Coşkun çalakîye de qisey kerd û ard ziwan ke Rayberê Şarê Kurdî Abdullah Ocalanî ra 22 mengan ra nata xeberêke zî nêna girewtene. Şevîne Coşkun vat: ''Çira Îmrali de qanûnî nênê caardene? Ma bêhuqûqîya Îmraliyî qebul nêkenê û her ca de na bêhuqûqîye teşhîr bikerê. Heta ke tecrîd biqedo têkoşînê ma do dewam bikero. Şar rewşa Ocalanî ra qerqilîyeno. Ganî avûkatî bieşkê muwekîlê xo Birêz Ocalanî bivînê. Şarî hewceyê mesajanê Abdullah Ocalanî yê.

Ma venga pêro hêzanê demokrasî û muxalefetî danê ke vera polîtîkayanê AKPyî pîya têkoşîn bikerê. Ma bi têkoşînê hemparî eşkenê peynîya tecrîdê Îmraliyî bîyarê. Tecrîd sûcê vera merdimatîye yo, ganî cade biqedo.''