Çalakîya wekîlanê HDPyî ya ke semedê wedaritişê tecrîdê serê Rayberê Şarê Kurdî Abdullah Ocalanî dîyaye destpêkerdene, aşmêke xo dima verdaye. Wekîlî Kemal Pekoz, Muazzeze Orhan, Şevîne Coşkun, Felaknase Uca, Omer Ocalan, Abdullah Koç, Kemal Bulbul, Erol Katircioglu, Serpile Kemalbay, Saît Dede, Murat Çepnî, Ayşe Surucu û Nûrane Îmîr tewrê çalakîye bîyî.

Saît Dedeyî ke nobete de qisey kerd, nê vatî:  ''Ewro roja 30.  ya nobeta ma ya. Ma sey  welîkan aşmêk a veng danê îqtîdarî ke wa goreyê qanûnan têbigêro. Fekê xo akenê qala dewleta huqûqî kenê la bi xo huqûq nêanê ca. Eke huqûq nêro caardene heq û huqûqê şarî ganî senî bêro pawitene? Tecrîdê Îmraliyî goreyê kamyew qanûnî yeno caardene? Kesê ke binê çimdarîya dewlete de yê 22 aşmî yo înan ra xebere nîna girewtene. Avûkat û merdimê înan nêeşkenê şirê pêvînayîş bikerê. Çîyo wînayên nîno qebulkerdene.

Ma tîya ra veng danê rayrapêroyîye. Heme problemê Tirkîya rîyê nê tecrîdî ra yê. Têna pê dîyalogî nê problemî eşkenê bêrê çareserkerdene. Birêz Ocalan têna semedê Tirkîya nê semedê şaranê dinya zî perspektîfêk teqdîm kerd. Birêz Ocalan her firset de vano o semedê haştîye hazir o la êyê ke şer wazenê pê tecrîdî cewabê ey danê. Wextê muzakereyanê 2013-2015î de rewşe senî bî wa her kes bîyaro xo vîrî. Pîya bi giranbîyayîşê tecrîdî Tirkîya de krîzan dest pêkerd. Eke haştîye zereyî yeno waştene, ganî tecrîd bêro wedaritene. Tecrîd heme welatî ra vila bîyo. Çime bewlî yo, problem bewlî yo û muxatabî bewlî yê. Heta wedaritişê tecrîdê Îmraliyî têkoşînê ma do dewam bikero.''