Sey xeylêk bajaranê bînan Dêrsim de zî wendekarî rîyê problemê cayê mendişî ra kuçeyan de yê.Wendekaranê Unîversîteya Munzurî ewro zî çalakîyêke waşt wa problemê wendekaran bêrê çareserkerdene.

Wendekarê ke verê cayê werdî yê unîversîte de ameyî têhet eşkerayîya çapemenîye daye.  Eşkerayîye de ame vatene ke ê do vera neheqîye milê xo çewt nêkerê û wayîrê heqanê xo vejîyê. Wendekaran vat: ''Seba ke wargehan de ca çîn o ê yenê tebereştene û hetê bînî ra unîversîte kontenjanan neweyan akeno. Rektorê Unîversîteya Munzurî pê nê karanê bêplanan krîz xorîn keno.''

Badê eşkerayîye wendekarî bi sloganan û çapikan ver bi banê rektorîye rayra şîyî. Verê rektorîye de sloganê ''rektor vejî teber'', ''wendekarî tîya de yê'' ameyî eştene. Wendekaran tîya çalakîya roniştişî kerde û seba ke rektorî înan reyde pêvînayîş nêkerd, waşt şirê verê berê ey. Polîsan verê înan girewt û destûr nêda. Wendekaran vat heta ke ê pêvînayîş nêkerê do nêşirê. Dima ra rektorî waşt wa yew di wendarî şirê zere la wendekaran vat ê wazenê pêro pîya qisey bikerê. Dima ra Rektor Ubeyde Îpek ame teber û pêvînayîş qebul kerd la herinda problemê cayê mendişî de têna propaganda kerde û xo wasifna. Wendekaran o protesto kerd û rektor agêra şi zere. Wendekarî bi slogana ''rektor îstîfa'' vila bîyî.