Kurdîstan de rîyê wesayîtanê zirxinan ê ke polîs û cendirmeyî şuxulnenê ra heta nika bi desan kurdî ameyî qetilkdene. Goreyê raporê Komeleya Heqanê Merdiman a Amedî yê mabênê serranê 2008-2018î de tewr tay 70 reyî serebûtê prodayîşê wesayîtanê zirxinan qewimîyayî. Netîceya nayî de 18ê înan domanî  û 6ê înan cinîyî pêro pîya 38  kesan dinyaya xo bedilnaye. La serra 2019î de Efe Tentekin (6), Oktay Er (22) û Cîhan Can (34) zî netîceya pirodayîşê wesayîtanê zirxinan de dinyaya xo bedilnaye.Endamê Baroyê Amedî Avûkat Suleyman Şahînî derheqê babete de qisey kerd.

Şahînî vist vîrî ke her cayê bajarî de bi bahaneyê asayîşî wesayîtê zirxinî estî û vat: ''Rixmo ke demo peyên de çalakîyê xurtî zî çîn ê her kuncik de wesayîtê zirxinî yenê cakerdene. Nê wesayîtî goreyê şertan eşkenê vernî de raverê la ê qet sebebê ci çînêbo zî lez ramanê û goreyê şertanê trafîkî tênêgêrenê. Mabênê taxe de suret kenê û benê sebebê vînbîyayîşê gan û malî. Xora ma senî ke Amed, Cizîre û xeylêk caynê bînan ê Kurdîstanî de dî hemwelatîyî yenê qetilkerdene la nê memurî karî ra zî nênê girewtene. Cezaya şenike sey kefaretî yena dayene. Ganî nê memûrê ke wesayîtanê zirxinan ramenê û benê sebebê mergî sey cara mirênayîşî ra bêrê  muhakemekerdene. Seba înan ercê cuya sîvîlan çîn o. Vanê sîvîlî eke mirênî wa bimerî. Xeymê înan de nêyo. Mesela Şirnex de wesayît kewt zereyê keyeyî û di birayî qetil kerdî. No cara, qestî ra mirênayîş o. Dezgehê komelê sîvîlî ez vana qey nê sey qezayî vînenê ke vera ci nêrazîbîyayîşo pîl ranêmojnenê. Beno ke tay raşta qeza bî la zafê înan eşkera cara mirênayîş o.''