Înîsîyatîfê Ocalanî rê Azadîye yê Rojawanî bajarê Strasourgî yê Fransa de derheqê tecrîdê serê Rayberê Şarê Kurdî Abdullah Ocalanî de Komîteya Vergirewtişê Îşkenceyî (CPT) reyde û bajarê Cenevre yê Swîsre de Komîserîya Berze ya Heqanê Merdiman ê Neteweyanê Yewbîyayeyan (OHCHR) reyde pêvînayîşî kerdî bi mîlyonan îmzayê ke semedê azadîya Rayberê Şarê Kurdî Abdullah Ocalanî ameyî arêdayene  teslîmê nê dezgehan kerdî.

Hemsereka Înîsîyatîfê Avûkatanê Ocalanî rê Azadîye yê Sûrîye Xanime Ayo ke nê heyetî de ca gena, ard ziwan ke înan derheqê tecrîdî û hêrişanê dewleta tirke yê vera Rojawanî de nê dezgehan reyde tay pêvînayîşî kerdî.

Xanime Ayo nê vatî: ''Ma sey înîsîyatîfî dezgehanê Ewropa de semedê Rayber Ocalanî muracat kerd. Seba ke Rayber Ocalanî ra xebere nîna girewtene ma Rojawan de kampanyaya îmzayan daye destpêkerdene. Ma nêtîceyê na kampanya pa mektubekî teslîmê CPT û OHCHRyî kerdî. Wird dezgehan zî ma pêşwazî kerdî û selahîyetdaranê dezgehan soz da ke do na rewşe sero vinderê. Ma qala hêrişanê dewleta tirke yê vera Rojawanî zî kerd ke şaro sîvîl yeno qetilkerdene. Înan zî vat do vengê ma biresnê cayanê selahîyetaran.

Dewleta tirke wazena Rayber Ocalanî kurdan û şaranê Rojhaletê Mîyanênî ra raqilno û paradîgmaya ci ya neteweya demokratîke çîn bikero. Heme hêrişî vera na paradîgma yenê kerdene. Xora coka dewletî paştî danê dewleta tirke.  Heme şarê Rojawanî, şarê Heleb û Şamî û Başûrê Kurdîstanî tewrê na kampanya bîyî. Şorişê Rojawanî 10 serrî xo dima verdayî. Paradîgmaya neteweya demokratîke semedê ma zaf muhîm a. Ma bi na paradîgma heta nê rojan ameyî. Coka azadîya Rayber Apoyî sere de azadîya ma ya. Têna semedê ma nê semedê hema şaranê bindestan wina yo.

Ewropa vera kurdan pêkerdişanê xo binpay kena. Coka ma ameyî Ewropa ke wa dezgehê wayîrê berpirsîyarîye wezîfeyê xo bîyarê ca. Şarê kurdî zî ganî sey heme şaranê bînan bibo wayîrê heqanê merdiman ê bingeyînan. Ganî tecrîdê serê Rayber Apoyî cade bêro wedaritene. Ma semedê cuya Abdullah Ocalanî qerqilîyenê. Ma wazenê helêke cuwa ver tira xebere bîgêrê. Vera hêrişanê dewleta tirke yê serê Rojawanî zî ganî dezgehê heqanê merdiman ê mîyanneteweyî heyetêk bişawê. Na bêvengîye rê hinî bes o. Ma veng danê  heme dezgehê heqanê merdiman ke wa bêveng memanê.''