Berpirsîyarê Komîteya Dîplomasî ya Têgêrayîşê Cimatê Demokratîkî (TEV-DEM) Aldan Xelîlî ANF’yî rê rojdem ercna.

Xelîlî bale ante xoverdayîşê vera îşxalê Efrînî ser û va: ‘’ Dewleta Tirkî bi heme hêzê xo erdê Efrînî fîna dest la çirey nêeşkaye îradeyê şar û xoverdayoxanê Efrînî bişikino. Ma bawer kenê ke Efrîn do bêro xelisnayene. Heme waştiş û planê ma naye ser o yê. Dewleta Tirkî senî ke bi serran o Vakurê Kurdistanî de semedê çînkerdişê  kultur,ziwan û tarîxê Kurdan tê gêrena nika zî heman polîtîka Efrîn de bica ana. Şarê Efrînî cayê ci ra vejenê herinda ci de keyeyanê çetayan ca kenê. La ê se kenê wa bikerê xoverdayîşê ma yê semedê azadkerdişê Efrînî dewam keno. Efîn do reyna ê Efrînijan bo.‘’

Xelîlî wina dewam  kerd: ‘’DAÎŞ hema temamî de nêqedîyo. Hetê zîhnîyetî ra sey tehtîdêk hema esto. Grûbê ci yê nimiteyî estî. No teyna semedê Rojawan û Vakurê Sûrîya nê  semedê heme merdimîye tehtîdêk o. Mucadeleyo hemparo ke heta nika vera DAÎŞ’î dîya ganî ewro ra tepîya vera înan ke çeteyan weye kenê  û paştî danê înan bêro dayene. Teyna wina peynîya DAÎŞ’î yeno. Çeteyê ke tepişteyî nê zî ganî hetê welatanê ci ra bêrê girewtene û bi Neteweyê Yewbîyayeyî û hêzanê mîyanneteweyî semedê muhakemekerdişê înan mehkeme bêro ronayene. ‘’

Aldar Xelîlî vat: ‘’Demê Cenevre felç bi. Sere de Sûrîye û teber de têsîrê muxalefetî estbi. La nika wina nîyo. Heme hêzan vîndî kerd. Sûrîya de qet têsîrê înan nêmend. Dewleta Tirkî zî ê rotî. Guta, Hûmûs, Hama, Haleb û tewr peynî de Îdlîb de destê xo înan ra ancena. Bîyê bêhêz. Cenevre wina felç bi. Astana zî mabênê Rûsya, Tirkîya û Îranî de bî. Bi operasyonê Îdlîbî a zî bîye bêtesîr. Hinî demê Astana nêmend.  Rûsya her çikas pêvînayîşan viraz zî têsîrê ci nêmend, raştî de qedîyaye. Ma roja ewilêne ra vanê pêvînayîşî wa binê serbanê Neteweyê Yewbîyayeyî de bêrê viraştene. Nika eke Cenevre  newe ra ganî bo û ma zî tede ca bîgêrê têsîrê ci beno. Ma semedê çareserîya sîyasî ya Sûrîya dîyalogî rê amade yê.’’

Xelîlî derheqê  herêma tampone de nê vatî: ‘’Nika îdareyê Vakur û Rojakewtena Sûrîya dir na babete ser o pêvînayîşî yenê viraştene. Çend kombîyayîşî ameyî viraştene. La hema nêtîceyêk nêameyo girewtene. Sey rojdemî werte de mend. Amerîka wazena ke sere de welatanê Ewropa û hêzanê koalîsyonî hempar bikero. Wazenê ke tayî çîyan Tirkîya rê bidê qebûlkerdene. Xora şertê ma zî estê. Hema îtîfaq zelal nêbîyo. Semedê îtîfaqî hema zeman hewce keno.’’