Xerîb, şehîdê HPG û MLKP’yî Atîna de ameyî bivîrardene
Endamê Konseya Serekîya Pêroyîye ya KCK’yî Dîyar Xerîb ke hêrişê hewayî yê rejîmê Tirkî de şehîd bibi, şehîd Newroze û şehîdê MLKP’yî paytextê Yunanistanî Atîna de ameyî bivîrardene.
Vîrardişê Atîna hetê Platformê Yewîya Çalakîye ya Yunanistanî ya Vakurê Kurdistan û Tirkîya ra ame organîzekerdene.
Vîrardiş de Xerîbo ke 5’ê Temmuze de Qendîl de şehîd bi, 5 gerîlayê ke 21’ê Adare de şehîd bîyî û gerîlayê HPG û MLKP’yî ke 10’ê Temmuze de Dêrsim de şehîd bîyî ameyî bivîrardene. 21’ê Adare, Newroz de hêrişê hewayî yê serê Qendîlî de fermandaranê verên ê mucadeleyê gerîla ra Sînanê Sor (Alî Aktaş), kadroyê karanê teberî yê KCK’yî Serhat Varto û Navdar Sînegir, Serhat Şafak û şerwano ciwan Şîyar Faraşîn şehîd bîbî. Hêrişê 10’ê Temmuze de zî fermandarê Yewîya Gerîlayanê Bejikî yê MLKP/FESK’î yê Dêrsimî Taylan Kûtlar (Adîl Yildirim), gerîla Hidir Çalli (Ozkan Aslan) û 3 gerîlayê HPG’yijî şehîd bîbî.Salona Merkezê Kulturê Kurdistanî ya ke tede vîrardiş ame kerdene de fotografê şehîdan û yê Rayberê Şarê Kurdî Abdullah Ocalanî ameyî daleqnayene.
