Goreyê di raporan ê ke hetê Pentegon û Neteweyê Yewbîyayeyî  ra ameyî amadekerdene çeteyê DAÎŞ’î yê ke  saha de bin kewtî, amadekarîya peyseragêrayîşî kenê. Raporan de bele ameye antene serê tehdîtê DAÎŞo ke 30 hezar endamê ci yê xerîbî estê.

Pîsporanê ke rojnameyê  L’Echo yê Belçîka rê qisey kerd vat ganî tehdîtê DAÎŞ’î  ser o bêro vindetene.Qelaya peyêne ke destê DAÎŞ’î de bî Adar a 2019’î  rayberîya QSD’yî de ameyebî wareginayene. Tayî vajê peynîya DAŞÎ’î ameya zî raporê peyênî rewşa ka bîne ramojnenê. Çimeyêko dîplomatîk yê Belçîka vano no çîyêko surprîz nêyo. Çeteyê DAÎŞ’î Afrîqaya Rojawane de zî aktîf ê.

Sermufetîşê  oprasyonê  Inherentî  yo ke Sûrîye û Iraq de mucadeleyê vera  DAÎŞ’î  hedef keno, Resolve Glenn A. Fineyî  raporê xo yê 2’ê Tebaxe yê konrgreya Amerîka de  ard ziwan ke çeteyî Iraq de hêrişanê sey  xokiştişî, destseranayîşî û vêşnayîşê erazîye  kenê. Heman raporî de ame vatene ke çeteyan Sûrîye de hucreyî pêardî û Iraq de oraganîzekerdişê xo hîra kerd. Goreyê raporê 18’ine yê Pentegonî  Sûrîye û Iraq de 14 ra heta 18 hezar endamê DAÎŞ’î estê.

Pîsporê  DAÎŞ’î yê Jerusalem Institute of Strategy and Securityî (JISS) Jonathan Spyerî  ard ziwan ke o çend mengê cuwa ver şîyo Iraq dîyo ke çeteyî herêma bejahîye de xo newe ra organîze kenê. Goreyê Syperî heman rewşe  Vakur û Başûrê Sûrîye de zî esto. Raporêkê Neteweyê Yewbîyayeyî  yo ke 15’ê Temmuze de amebi eşkerakerdene de zî çîyê winayên amebî vatene.