Yeno parekerdene ke şer û alozîya vizêrî ra dima dewleta tirke û Heyet Tehrîr El Şamî (HTŞ) dest pê pêvînayîşî kerd. Vizêr dewrîyeyê hemparî yê tirk-rûsî ra verî rayîrê Heleb-Lazkîye de artêşa tirke çalakîkeran ser o guleyî varnaybî û di kesî kiştbî. SÎHAyanê artêşa tirke zî bendêkê HTŞyî kerdbi hedef û HTŞyî zî dabi bendêkê artêşa tirke yê Neyrabî.

Yeno vatene ke na alozîya ra semed selahîyetdaranê tirkan û heyetêkê HTŞyî Kampa El Mustama de dest pê pêvînayîşan kerd.

Peymana Moskova

Şerê mabênê artêşa tirke û artêşa Sûrîye yê menga sibate ra dima Serekkomarê Tirkîya Recep Tayyîp Erdogan şibi Moskova û Serekdewletê Rûsya Vlademir Putînî ra waştbi ke adirbirnayîş îlan bikero. 5ê adare de peymana adirbirnayîşî amebî îmzakerdene. Qerarê peymane wina yê:

-Îdlîb de 6ê adare ra dima karê leşkerî do bêrê vindartene.

-Herême de rayîrê mabênê Heleb-Lazkîye (M4) de pê 6 kîlometreyan vakur de û pê 6 kîlometreyan zî başûr de korîdorêk do bêro akerdene.

-Nê korîdorî de 15ê adare ra dima dewrîyeyê rûs-tirkî do dest pêbikerê.

La sere de HTŞ zaf komî vera dewrîyeyê hemparî yê. Alozîye ra semed dewleta tirke çend rojî verê cû hêzê xo yê polîsan erşawitbî herême. Heyet Tehrîr El Şamî zî hêzê xo yê çekdarî vera polîsanê tirkan de ca kerdbî.