Îran de û Rojhelatê Kurdîstanî de 21ê sibate de weçînayîşê dewirê 11. yê Parlamento û Meclîsê Pisporana ameyî kerdene.

Venga 58 mîlyon weçînitoxan amebş kerdene ke raya xo bidê. Netîceyê weçînayîşî ganî 22ê sibate de biameyêne eşkerakerdene labelê eşkera nêbîyî.

23ê sibate de nêmroje ra dima Wezîrê Karanê Teberî yê Îranî Abdurriza Rahmanî Fazlîyî bi kombîyayîşêkê çapemenîye netîceyî eşkere kerdî.

Fazlîyî ard ziwan ke rêjê tewrbîyayîşî se ra 42.57 yo. Goreyê Fazlîyî 58 mîlyon weçînitoxan ra têna 24 mîlyon û 512 hezar û 404 kesan raya xo daye.

Fazlîyî seba rêjê tayî yê tewrbîyayîşî zî tay bahaneyî ardî ziwan: ''Rîyê vîrusê Korona, kewtişê teyaraya Ukrayna, nawnayîşanê şarî yê vera vaya benzînî ra.''

Wezîrî noykotê partî û têgêrayîşanê kurdan KODAR, PJAK, ÎKDP, HDK, Komala û muxalîfanê Îranî ser o xo na nêzanî.

Goreyê netîceyanê weçînayîşî Tehran de 11 mîlyon weçînitoxan ra 2 mîlyon û 538 (se ra 26) weçînitoxî tewrê weçînayîşî nêbîyî. 

Goreyê netîceyan muxafazakeranê terefgîranê Muxafizanê Şorişî yo ke dewirê 10. ê parlamento de rêjê înan se ra 55 bibi,  weçînayîşan ra dima rêjê înan bi se ra 75.

Hûmara reformîstan zî se ra 45 kewte bîye se ra 25.