Dimayo ke Mahkemeya Berze ya Îspanya îdarekarê Katalanî yê terefgirê serebestîye mehkûm kerdî, roja Dişemeyî ra nata pêroyê Katalonya de çalakîyê şermezarkerdişî yenç viraştene. Şer zî her şan qewimîyeno.

Roja Îneyî grevo pêroyî estbi û zafê cayanê herême ra çalakgerî şîyê Barcelona. Nawnayîşanê pêroyînan de nêm mîlyonî ra zêdêr merdimî  amade bîyî. Şan zî mabênê komanê terefgiran ê serbestîye û polîsan de şer qewimîyayo. Şaristan de dîmenê kaosî estbî. Şer de ke di saetan ra zêdêr dewam kerd, polîsan fîşekê plastîkî û bombayê gazî xebitnayî. Zafê cayanê şaristanî de adir ame eştene, bendî ameyî dayene û slogana ‘Meydanî ê ma yê’ ameye vatene.