Vervatoxê Artêşa Neteweyî ya Lîbya ya pabesteya Mareşal Xelîfe Hafterî El Misrarî pare kerd ke SÎHAyanê dewleta tirke serê sibayê sêşemeyî şaristanê Mizda de da wesayîtêkî ro. 

El Misrarîyî da zanayene ke Serekkomarê Tirkîya Recep Tayyîp Erdoganî vera şarê erebî û Lîbya qirkerdişêk kerd û vat: ''Vera wesayîtêko ke malzemeyê werdî kiriştêne hêrişêk ame kerdene. Hêriş de tewr tay 5 sivîlî ameyî kiştene. Teyarayî nênê waranê şerî, herêma sivîlan hedef kenê. Wesayîtê werdî reyde dewleta tirke rojhelatê Misda de herêma Nisma ser o zî bombayî varnayî.''

No hêriş dima ke Hafterî rayberîya xo îlan kerde, ame kerdene. Hafter Hukmatê Yewîya Neteweyîye yê merkezê ci Tarblusî de yo, red keno ke dewleta tirke paştî dana nê hukmatî. Hafterî îfade kerd ke operasyonê vera Trablusî do dewam bikerê.

Rejîmê tirkî zî prosesê janê vîrusê Korona xo rê sey firsend dî û paştdayîşê xo yê seba Trabluso ke tede serwerîya Îhvanê Muslîmîn esta, zêdîya. Rejîmê tirkî ambargoyê çekan ê NYyî binpay keno û Îhvanî rê hetkarîya çekan, leşker, cergan û wesayîtan keno. Rejîmê tirkî bi hezaran cergê Sûrîye erşawitî Lîbya û perwerde dano bi hezaran cergan ke înan zî bierşawo.