Vervatoxê Artêşa Neteweyîye ya Lîbya ya pabesteya Hafterî Ahmed El Mismarî Bîngazî de eşkerayîyêke daye û vat: ''Fermandarîya Pêroyî pare kerd ke operasyonê leşkerî vinderê.''

Mismarîyî da zanayene ke adirbirnayîş vengdayîşê ''welatan ê dostan'' ser o ame qebulkerdene û hîşyar kerd ke eke terefo dûş adirbirnayîş binpay bikero ê do bi lezî cewabê înan bido.

Neteweyanê Yewbîyayeyan, Yewîya Ewropa û xeylêk welatanê bînan hewteyêkê vîyarteyî de bi wesîleya menga remezanî seba adirbirnayîşî veng dabi.

Hêzê Hafterî serrêke ra zêdêr seba kontrolkerdişê Trablusî operasyonan kenê. Hukmatê Yewîya Neteweyîye yo ke merkezê ci Trablus de yo û rejîmê tirkî paştî dano ci hema cewab nêda îlanê adirbirnayîşî. Hêzanê Tarblusî di hewteyî verê cû şaristanê stratejîkî vistbî destî û dormeyê Tarhuna girewtbi ke cepheyanê girîngan ê Hafterî ra bi.

Rejîmê tirkî pandemîya Covid-19î xo rê firsend dî û paştdayîşê seba hukmatê Trablusî yê Îhvanî kerd zêdêr.

Hafterî hewteyêkî verê cû rayberîya xo îlan kerdbî.