Serra 2011î de rejîmê Kaddafîyî hetê NATOyî ra amebi çinkerdene û a roje ra nata Lîbya de alozîyêka pîle esta. Rojhelatê welatî de hêzê Halîfe Heftarî û rojawanê ci de zî hukmatê Yewîya Neteweyîye esta ke Neteweyê Yewbîyayeyî zî nê hukmatî nas kenê.

Hêzanê Halîge Heftarî nîsana 2019î ra nata seba girewtişê Trablusî operasyonêk da destpêkerdene. Hewteyê vîyarteyî de şaristanê Sîrte kewt kontrolê hêzanê Heftarî. Şerê mabênê di hêzan 9 meng ê ke dewam keno. Dewleta tirke û hukmatê Trablusî menga teşrîna peyêne de peymanêka leşkerîye kerde dima zî tezkere ame qebulkerdene. Na game alozîya Lîbya kerde zêde.Rûsya û dewleta tirke Lîbya de paştî danê hêzanê herêmîyan û vengdayîşê adirbirnayîşî kerd. Adirbirnayîş mabênê her di hêzanê Lîbya de ame kerdêne.

Adirbirnayîş reyde binpaykerdiş zî dest pêkerd

Heftar û El Saracî cewabêk da adirbirnayîşî û roja yewşemeyî saete 01:00î ra dima adirbirnayîş dest pêkerd. La dima her di hêzan yewbînî suvdar kerdî ke goreyê adirbirnayîşî tênêgêrenî. Fermandarê Artêşa Lîbya yo ke pabesteyê Hafterî yo eşkera kerd ke înan da wesayîtêkê hewayî yê dewleta tirke ro.Dewleta tirke ambargoyê çekan ê Neteweyanê Yewbîyayeyan bin pay kerd û zaf çekî, wesayîtê zirxînî û hewayî Lîbya rê erşawitî. Nê hewteyanê peyênan de teyarayan zaf cergî  Sûrîye ra berdî Trablusî.

Hêvîya Moskova!

Heftar û Sarac ewro seba ke adirbirnayîş îmza bikerê şîyî Moskova. Armancê nê zîyaretî no yo ke adirbirnayîşo fermî bêro îlankerdene. Serekwezîrê Almanya Angela Merkel zî pêşnîyaz qebul kerdbi û Berlin de Lîbya ser o do konferansêkê haştîye bêro serûberkerdene. Serekkomarê Fransa Emmanuel Macronî zî bi rayîrê telefonî Serekdewletê Rûsya Vlademîr Putîn reyde qisey kerd û vat: ''Adirbirnayîş ganî mende bibo û bêro kontrolkerdene." Yeno eşkerakerdene ke Fransa, Rûsya, Emîrîyê Ereban ê Yewbîyayeyî, Urdun û Misir paştî danê Hafterî. Tirkîya û Katar zî paştî danê Trablusî. Kifş bibî ke ke Rûsya şîrketêke ser o bi hezaran leşkeran rê meaş erşawitbi. Seba ke garantorê adirbirnayîşî dewleta tirke ya warê mendebîyayîşê adirbirnayîşî de Lîbya de gumanê pîlî estê.