Înîsîyatîfê 'Rayber Apoyî rê Azadîye' ra Silêman Îsa Ehmedî derheqê Hemleya 'Rayber Apoyî rê Azadîye, Meseleya Kurdan rê Çareserîye' de ANFyî rê qisey kerd.

Ehmedî da zanayene ke serra yewine ya Hemleya Azadîye de nînan xeylêk çalakîyî kerdî û vat: ''Na hemleya ke 74 welatan de dîyabî destpêkerdene astêka berze de vila bîya. No zî mojneno ke dinya senî qîmet dana azadî û fikranê Rayber Apoyî. Ma zî destpêkî ra nata bi aktîfî tewrê çalakîyanê hemle bîyî. Eke ma seba azadîya Rayber Apoyî têkoşîn nêkerê hinî ma do raştîya xo ya azadîye û estbîyayîşê xo vinî bikerê. 

Şarê Rojawanî çarçewa hemle de tim waran de yê. Wexto ke ma dest pê kampanyaya îmzayan kerd ma hedefê xo ra zafêr îmzayî arê dayî. Şorişê Rojawanî ra dima xora şar bi xurtî dormeyê paradîgmaya Rayber Apoyî de ame têhet. 

Çarçewa hemle de zî ma xeylê konferansî viraştî, ma dezgehanê mîyanneteweyîyan ê sey CPTyî rê mektubî şawitî, partîyê sîyasîyî zîyaret kerdî, eşîran de pêvînayîşî kerdî ûsn. Her kes bi xurtî nê xebat û çalakîyan de cagirewt. Hemleya ke serrêke xo pey de verdaya netîceyê pîlî vetî werte. Komelê Rojawanê Kurdîstanî bi ruhêkê pîlî wayîrê Hemleya Azadîye vejîya. Ma do qetî azadîya Rayberê xo bîyarê ca.''