Almanya de janê Korona gêrîyabi binê kontrolî. La dima şaristanê Rheda-Wiedenbruckî de selexaneyê Tonnies Holdingî  vîrusê Korona ame tesbîtkerdene. Vîrus selexane de vila bi fabrîkaya goştî ya ke tede 7 hezar karkerî xebitîyenê, gêrîyaye binê karantîna. Selexane de tewr tay 1550 karkerî pê vîrusê Korona kewtî. Babete medyaya Almanya de xeylêk ca girewt. Pisporan û muxalefetî bale ante şertanê xiraban ê fabrîka ser. Fabrîka de karkerê multecîyî pê pereyanê tayan ameyêne xebitnayene.

Seba ke wayîrê holdîngî Clemend Tonnies embazo nêzdî yê sîyasetmedaran o bêtedbîrîye yena peygoş kerdene û derheqê fabrîka de tehqîqat nêdîyeno destpêkerdene. Nê sîyasetmedaran ra yew zî Sigmar Gabrial o ke terefgîrê rejîmê Erdoganî yo.

Kanala televîzyonî ARDyî da zanayene ke Gabriel Tonnies Holdingî ra seba şêwirmendîye meaş gêno. Wezîfeyê Gabrielî û prosesê janî heman menge adare de dest pêkerd. Tonnies kanale de no zanayîş tesdîq kerd. Menganê vîyarteyan de vejîyabi werte ke Gabriel seba lobîyanê çeke zî xebitîyeno.

Gabriel perwerê Erdoganî yo

Gabriel krîzanê mabênê Anqara û Almanya de zî bi hawayêkê nakokî têgêra. Gabrielî Almanya de pê vatişanê xo vera Anqara vindartêne la Anqara de zî pê vatişanê xo paştî dayêne rejîmê Anqara. Gabrielî pê dişmenîya vera Têgêrayîşê Azadîye yê Kurdîstanî tim xîret kerd ke xo nêzdîyê rejîmê Anqara bikero.

Gabrielî wextê prosesê krîzê rehîne yê mabênê Almanya û Anqara de ame Antalya û rejîmê Anqara reyde bazarîya gemarine kerde. 4ê teşrîna peyêne de zî Wezîrê Karanê Teberî Mevlut Çavuşoglu şi keyeyê Gabrielî. Gabriel wexto ke keyeyê xo de Çavuşgluyî rê çay kerdêne de dîmenê ci ame girewtene. Naye ra dima Gabriel nameyê 'çaygerê Erdoganî' ame pênasekerdene.

Gabriel teşrîna verêne de îşxalê Rojawane de zî televîzyonan de avûkatîya Erdoganî kerde. Gabrielî seba îşxalanê ke hetê Almanya ra 'vera huqûqê mîyanenetweyî yê' ameyî îlankerdene, vat ke rejîmê Erdoganî 'heqdar' o.