Azerbeycana ke dewleta tirke paştî dana ci, vera Karabaxî hêrişêko giran kerd û bi desan kesî hêriş de merdî. Warê mîyanneteweyîyî de zî seba adirbirnayîşî vengdayîşî yenê kerdene. Fransa pare kerd ke ê hetê şarê armenî de yê.
Wezaretê Pawitişî yê Karabaxî yo ke Armenîstan paştî dano ci dişeme eşkerayîyêke daye û da zanayene ke hêrişê Azaerbeycanî de 15 leşkerê înan kişîyayê.
Roja yewşemeyî de zî destpêkê hêrişan ra nata 32 şerwanê armenî kişîyayê. Hetêr bînî ra Karabax de 5 sivîlê azerîyî û 2 armenê sivîlî merdî. Azerbeycanî derheqê leşkeranê xo yê kişteyan de eşkerayîyêke nêdaye.
Labelê goreyê Wezaretê Pawitişî yê Armenîstanî tewr tay 200 leşkerê Azerbeycanî şer de kişîyayî.
Herêma Karabaxî ya ke tede armenîyî ciwîyenê, serra 1991î de bi hawayêkê yewterefî xoserîye îlan kerdbi. No şero ke tede bi hezaran kesî merdî, serra 1994î de bi adirbirnayîşî qedîya. Azerbeycan erdo ke îdîa kerdêne ê ci yo, se ra 13ê ci vîn kerd.
Dima ke roja yewşemeyî şerî newe ra dest pêkerd Armenîstan rewşa îstîsnayîye û seferberîye îlan kerde. Serekwezîrê Armenîstanî Nikol Paşiniyanî pare kerd ke Azerbeycan vera şarê armenî 'şer îlan kerdo' û Armenîstan û Azerbeycan 'verê şerêkê pîlî de yê.' Paşiniyanî vera tewirê hêrişkerî yê dewleta tirke zî nêrazîbîyayîşê xo mojna.
Dewleta tirke pêro selahîyetdar û medyaya xo reyde asta 'dişmenîya vera armenan' de têgêrena. Goreyê zanayîşan Anqara mabênê çend hewteyan de bi seyan cergî erşawitî Azerbeycan.
Wezaretê Pawitişî yê Azerbeycanî zî pare kerd ke înan 'pêro cepheyan de dest pê operasyonî kerd.' Serekkomarê Azerbeycanî Îlham Alîyevî sozê 'serkewtişî' da. Sey Armenîstanî Azerbeycan zî nêmeyê şewa yewşemeyî 'rewşa îstîsnayîye' îlan kerde. Paytext Bakû û xeylêk herêmanê bînan de vejîyayîşê teberî qedexe yo.
Luleyê petrol û gazî yê Dengizê Hazarî nêzdîyê herêma Karabaxî ra derbaz benê. Dima ke Azerbeycanî gef werd ke do hêrişê santralê nukleerî yê Armenîstanî bikero, Armenîstanî zî derheqê rîskanê Başûrê Kafkasya de hîşyarî daye.
Putinî Paşiniyanî reyde Erdoganî zî Alîyevî reyde qisey kerd
Serekdewletê Rûsya Vlademir Putinî Serekdewletê Armenîstanî Paşiniyanî reyde telefon de qisey kerd. Labelê tedayê qiseykerdişî pare nêkerdî. Heman wextî de Serekkomarê Tirkîya Erdogan zî Îlham Alîyevî reyde qisey kerd.
Fransa: Ma şarê armenî reyde de yê
Warê mîyanneteweyî ra DYA û Neteweyanê Yewbîyayeyan zî tede xeylêk hêzan seba adirbirnayîşî veng da.
Serekkomarê Fransa Emmanuel Macronî bi eşkerayîyêke pare kerd ke ey îdarekaranê armenî û azerîyan reyde qisey kerd û waşt ke Karabax de cade adirbirnayîş bêro caardene. Macronî vat: ''Her kes zaneno ke Fransa nêzdîyê şarê armenî ya. Fransa tim hetê şarê armenî de ya. ''
