Derheqê derba teyarayanê Rûsî yê vera artêşa tirke de hetê medyaya erebe, çimeyanê heremîyan û medyaya komelkîye ra xeylêk zanayîşî ameyî parekerdene. Dewleta tirke destpêkî de îdîa kerd ke têna 9 leşkerî kişîyayî labelê ereyê şewe de na hûmare bîye zêdêr. Nêmeyê şewe bi eşkerayîyêke ame parekerdene ke 29 leşkerî ameyî kiştene.

Goreyê zanayîşanê ke ANFyî herême de girewtî tewr tay 113 leşkerê tirkî yê îşxalkerî ameyî kiştene û bi desan leşkerî zî birîndar bîyî. Beşêkê kişte û birîndaran ameyî berdene bi Nêweşxaneyê Hatayî, tay birîndarî zî nêweşxaneyanê Dîlokî de yê. Reyhanli de zî trafîk ame girewtene.

Ama îdîakerdene ke teyarayê şerî yê tirkî kewtî warê hewayî yê Îdlîbî. Şanê pancşemeyî ra nata serebûtê ke qewimîyayî wina yê:

Dezgehê Çimdarî yê Heqanê Merdiman ê Sûrîye yo ke merkezê ci London de yo pare kerd ke Cebel Zawîye, Zakûm û Sehl El Gabî de tewr tay 34 leşkerê tirkî ameyî kiştene.

Ame îdîakerdene ke tewr tay 100 cenazayî ameyî

Goreyê xebera Ajansê Mezopotamya Nêweşxaneyê Reyhanliyî ame girewtene û tîman seba gonîye anons kerd. Heman xebere de nê zanayîşî ameyî dayene: ''Yeno vatene ke 100 cenazayê leşkeran ardî nêweşxane û bi desan leşkerî zî birîndarî. Cenazaya 32 leşkeran berdî Nêweşxaneyê Neweyî yê Hatayî û bi desan leşkerê birîndarî zî berdî uca. Şar verê nêweşxaneyan de kom bi. Ewro seba mamostayanê camêrdan kaxidê seferberîye ame erşawtene. Sînor de têgêrayîşê leşkeran zêde yo. Sînorê Ogulpinarî sey warê qedexekerdeyî yê leşkerî ame îlankerdene. Yeno vatene ke tay dewijê ke sînor de keyeyî înan estê herême veng kenê. Servîsê leşkerî yê Nêweşxaneyê Îskenderûnî birîndaran rê ame girewtene. Yeno vatene ke nêweşxaneyê Hatayî pêro seba leşkeran ameyî girewtene.''

Qeydê vengî: Morg bi cenazayan pirr o

Medyaya komelkîye ser o qeydêkê vengî ame vilakerdene ke tede kesêk qala Nêweşxaneyê Reyhaliyî keno û wina îdîa keno: ''Ma morg de cenazayê 58 şehîdan peymitî. Hema zî cenazayan anê.''

Kêseko bînî zî vano: ''Ma bi kîrpî 25-30 şehîdî erşawitî Nêweşxaneyê Hatayî. Hema zî binê xirbeyan de şehîdî estê. Rewşe cidî ya, hendek zî birîndarî estê.''

Kesêko ke bermeno vano: ''No raşt a zî baş nîyo, şehîdan anê. Wesayîtî pirr şehîd ê.''

Eşkerayîye çin a

Selahîyetdaranê tirkan Beştepe de kombîyayîşo berz ê asayîşî kerd. Goreyê medyaya tirke kombîyayîşo berz hetê Serekkomar Erdoganî ra ame kerdene û Wezîrê Pawitişî Hulusî Akar, Wezîrê Karanê Teberî Mevlut Çavuşoglu, Serekê Fermandarîya Pêroyîye Yşar Guler, fermandarê baskanê artêşe û Serekê MÎTî Hakan Fîdan tewrê kombîyayîşî bîyî.

Wezîrê Karanê Teberî Çavuşoglu bi rayîrê telefonî Sekreterê Pêroyî yê NATOyî Stoltenbergî reyde qisey kerd.

Walî: 29 leşker merdî

Wextê kombîyayîşê berzî yê asayîşî de WalîyêHatayî Rahmî Doganî eşkerayîyêke daye û îdîa kerd ke 9 leşkerê tirkî merdî. Walîyî dima eşkerayîyêka diyîne weşanaye û vat ke hûmara 22 ya, labelê nêmeyê şewe de reya hîreyîne eşkerayîye daye û pare kerd ke hûmara kişteyan bîye 29. Goreyê Walîyî 36 leşkerî zî birîndar bîyî.

Rûsya: Tirkîya peymana Soçî binpay kerde

Atmosferekê winasênî de Wezaretê Pawitişî yê Rûsya eşkerayîyêke daye. Wezaretê Pawitişî vat: ''Tirkîya peymana Soçî binpay kerde, Îdlîbî ser o bombayî varnayî û paştdayîşê xo yê seba cergan dewam kena.'' Wezaretî da zanayene ke Tirkîya dest pê xebitnayîşê droneyan zî kerd. Wezaretê Pawitişî yê Rûsya da zanayene ke droneyêkê tirkî roja sêşemeyî ame warvistene.

Medyaya komelkîye ameye astengkerdene

Saete 23:30î ra dima twîtter qels bi û vindert. Goreyê doneyanê dezgehê NetBlocks.org twîtter pêro Tirkîya de ame astengkerdene.

Serekê RTUKî fermanê sansurî da

Serekê Heyetê Berzî yê Raydo û Televîzyonî (RTUK) Ebubekîr Şahînî dezgehê çapemenîye hîşyar kerdî û ferman da ke dewleta tirke ra berî medyayêke wa xeberêke nêda.

Trafîkê dîyalogî

Nêmeyê şewe de vervatoxê Serekkomarê Tirkîya Îbrahîm Kalin bi rayîrê telefonî Şêwirmendê Asayîşê Neteweyî yê DYA Robert O'Brienî reyde qisey kerd. Derheqê babeta telefonî de eşkerayîyêke nêame kerdene.

Serekê Îrtîbatî Fahrettîn Altunî zî eşkerayîyêke daye û gef wend ''qat bi qat cewab do bêro dayene.''

Washington: S-400an ca verdê

Îdareyê DYA zî şerê Sûrîye ra dima venga Tirkîya da ke sîstemê pawitişê hewayî yê rûsî yê S-400an ra fek vera bida.