Mudirê Pêroyî yê WHO Tedros Adhanom Ghebreyesusî veng da ke wa tedbîrê vera Korona bêrê pîtkerdene û vat: ''Xo mexapînê semedê janê Korona rayîyêko derg vernîya ma de esto. No jan do wextêko derg mîyanê ma de bimano.''

Ghebreyesusî bale ante ser ke bitaybetî Rûsya û Amerîka de astenkerdişê vera Korona yeno şermezarkerdene û vat: ''Nê çalakîyan de şertê mesafeyê sosyalî nêno caardene. No zî rîskê verdayîşê janî zafêr keno. Goreyê donayanê ke destê ma deyê nufusê dinya ra qismêko gird eşkeno nê janî bigero.''

Mudirê Pêroyî yê WHO eşkerayîya xo ya 13ê nîsane de vatbi ke têna dermanê ko bitesîr eşkeno janî temamî de werte ra wedaro.

 Almanya ke cigêrayîşê derzîna vera janî de ya roja çarşemeyî dabi zanayene ke înan laboratuwarêk de dest pê testanê klînîkî kerd.