Borellî Strasbourg de Parlamentoyê Ewropa de qisey kerd û vat: "Ma zanenê ke no pêkewtiş pê çareserîyêka leşkerî safî nêbeno. Ma seba Sûrîye zî heman çi vatbi. La Sûrîye de çarserîyêka leşkerî amebî ceribnayene. Nika no rîsk seba Lîbya zî esto. Tirkîya û Rûsya hemsencîya Dengizê Sipî vurnaye. Ma do qebul nêkerê ke heman rewşe Lîbya de xo bimojna."

Borellî îfade kerd ke Anqara û Moskova bi hawayêkê leşkerî mudaxeleyê Lîbya kenê û vat: "Goreyê zanayîşan Sûrîye ra zaf leşkerê bipereyî ameyî berdene bi Lîbya."

Borellî venga Yewîya Ewropa (YE) da ke alozîya mabênê xo safî bikera û seba çareserîya Lîbya xîret bikera. Borellî da zanayene ke eke Lîbya de şerêk biqewimîyo bi se hezaran kesî do koçê Ewropa bikerê.

Borellî derheqê Konferansê Lîbya yo ke 19ê çeleyî de do bêro kerdene qisey kerd û vat: "Beno ke ma do xeberanê weşan bigêrê beno ke ma do nêgêrê."

Şerê zereyî yê Lîbya de Rûsya, Emîrîyê Ereban ê Yewbîyayeyî, Misir, Urdun, Fransa paştî danê Halîfe Hafter. Tirkîya û Katar zî paştî danê hukmatê Trablusî. Tirkîya ambargoyê Neteweyanê Yewbîyayeyan binpay kerd û Birayanê Misilmanan ê Trablusî rê çekî, wesayîtê zirxînî, dron û cergê El Nusra, DAÎŞî û leşkerê xo erşawitî.

Hafter û Sarac  vengdayîşê adirbirnayîşî yê Tirkîya û Rûsya ser o 13ê çeleyî de şî Rûsya. La Hafterî peymana adirbirnayîşî îmza nêkerde û agêra Lîbya.