Dimayo ke Tirkîya bi binpaykerdişê huqûqê mîyanneteweyîyî qeraxê Qibrisî de dest bi cigêrayîşê gazê xozayî kerd, Yewîya Ewropa qerar da ke tayê mueyîdeyan Tirkîya ser o bica bîyaro. 

Na çarçewa de do hetkarîya malî ya verê tewrbîyayîşê Yewîya Ewropa do serra bêro de biameyêne dayene ame birnayene, heman wextî de têkilîyê ekonomîkî û sîyasîyî yê payeberzî ameyî vindarnayene. Selahîyetdaranê rejîmê Erdoganî zî cade serê peymana koçberan a ke serra 2016 de amî amadekerdene ra Yewîya Ewropa rê gefî wendî. Wezîrê Karanê Zereyî yo Tirk Suleyman Soylûyî gef wend û vat, „Ma beran akerê do hukmatî nêeşkê 6 mengan zî îdare bikerê.“ Wezîrê Karanê Teberî yo Tirk Mevlut Çavûşoglûyî zî pêhesna ke peymana ke Yewîya Ewropa dir amîya amadekerdene amîya vindarnayene. Vervatoxêkê Komîsyonê Ewropa çapemenîya Awusturya rê qisey kerd û vat ke peymana koçberan a ke Enqereyî dir ameya kerdene de vurayîş çino. Goreyê peymana ke Çavûşoglûyî vat ‚ma vindarnaya‘ koçberê ke bi rayîrê qaçaxî xo resnayê Yunanistan do hetê Tirkîya ra newe ra bêrê qebulkerdene. Bedelê nê de zî Komîsyonê Ewropa paketêka hetkarîye ya 1.4 mîlyar Euroyî pêşkêşê Enqereyî kerdebî.