Roja Dişemeyî dimayê kombîyayîşê Heyet ê Wezîran eşkerayîya nuştekîye  ameye weşanayene û ame vatene  ke wextê humat o verênî de çar serre û nêmeyan de hezar û 806 multecîyî ameyî erşawitenê.

Hukmetê Kyrîkaos Mîçotakîsî da zanayene ke ê wazenê heta peynîya serra 2020'yî 10 hezar multecîyan peyser bierşawê Tirkîya.Wextanê vîyarteyan de zafê multecîyî Tirkîya ra şîyê Yunanîstanî. Dimayê serra 2016 peymana ser multecîyan ra nîsbetê îltîcakerdişan zêde bîyo. Hukmatê Yunanîstanî do Dengizê Ege de tedbîranê xo bike zêde, multecîyanê giraweyan bierşawe herêmanê bînan û seba kesanê ke qaçax û waştişê înan ê îltîcayî ame redkerdene zî merkezan saz bike.

Goreyê peymana mabênê Yewîya Ewropa û Tirkîya de ya ke serra 2016 de amebi îmzakerdene do macîrê qaçaxî û multecîyê Sûrîyeyijî ke ser Tirkîya ra ameyî Yunanîstan, do bêrê erşawitene. Rêxistinê Heqan ê Merdiman û Rêxistinê Multecîyan da zanayene kenê ke na peymane verba merdimî ya. Dimayê Adara 2016 êyê ke xo resnayê Yunanîstan seba ke nêrê sînorteberkerdene waştişê îltîcayî kerdî.