Cinîyê ke seba paştîdayîşê Leyla Guvene şîyî vernîya Zîndano Girewte yê Tîpî Eyî yê Amedî raştê hêrişê polîsan ameyî. Çalakwananê ke vera hêrişî xover da û peyser game nêeşte înan ra 20 cinîyî ameyî destbendkerdene.
Cinîyê ke seba paştîdayîşê Leyla Guvena ke 74 rojî yo seba wedartişê tecrîdê serê Rayberê Şarê Kurdî Abdullah Ocalanî grevê vêşanîye de ya, şîyî vernîya Zîndanê Amedî raştê hêrişê polîsan ameyî. Tewr tay 20 cinîyî ameyî destbendkerdene.
Endamê Komala Cinîyan a Roza û Platformê Cinîyan ê Dîcle Amedî û parlamentera HDPyî ya Amedî Remzîye Tosûne zî tede xeylî cinîyî bi siloganan verê xo da Zîndanê Amedî. Polîsan çalakwanî girewtî binê ablûqa la çalakwanan rixmê naye çalakîya xo rê dewam kerde û veng da xoverdayîşê Guvene.
POLÎSAN HÊRIŞ KERD CINÎYAN XOVER DA
Polîsan hêrişê cinîyan kerd. Hemsereka Komala Cinîyan Roza Adelet Kaya, vervatoxa dewrî ya Platformê Cinîyan a Dîcle Amedî Bahar Karakaş Ulu hetê polîsan ra erd ra ameyî kaşkerdene û darbkerdene. Polîsan parlamentere Tosune rê nêng çînayî û darb kerd. Vera hêrişî cinîyan bi slogana‘ Bijî berxwedana zîndanan‘ reaksîyon ramojna. Rixmê hêrişê polîsan Cinîyî xeylî wext vernîya zîndanî de xover da.
Hêrişê polîsan de 20 cinîyî ameyî destbendkerdene. Êye ke ameyî destbendkerdene nameyê ke zelal bîyî winayê: Hemsereka Komala Cinîyan Roza Adelet Kaya, vervatoxa dewrî ya Platformê Cinîyana Dîcle Amedî Bahar Karakaş Ulu, Ceylan Aslane, Gonul Adibelli û şewîrmenda Remziye Tosûne Gurbet Ozere.
