Koordînasyonê KJK’yî ra Rewşan Mêrdîne vat Erdogano ke vîneno peynîya ci yena, mexmela mayan ra zî terseno.

Mêrdîne Stêrk TV de qisey kerd, ard ziwan ke tecrîdê serê Rayberê Şarê Kurdî Abdullah Ocalanî dewam keno û pêvînayîşê 2’ê Gulane yê avûkatan nêno manaya qedîyayîşê tecrîdî. Mêrdîne vat problem bi çend pêvînayîşan çareser nêbeno û vat, “Ganî no tecrîdo ke hemverê merdimîye de yo wedarîyo. Eke no tecrîd wedarîyo tena o wext do grevê vêşanîye biqedîyê.”

Dewlete do Cewab Senî Bido?

Mêrdîne vat Rayberê Şarê Kurdî Abdullah Ocalan halê tecrîdî de zî tewirê xo yê aşitî û çareserîye ramojneno û wina vatişê xo wina domna, “Rayber Apo vano ke o do bi mîsyonê aşitîye tê bigêro. Dewlete do çi cewabî bido nê peyamî? Ganî hemeyê şarî kayê Erdogan ê dîktatorî bivîno. Ganî hemverê nê dîktatorê zordar û zalimi de xoverdayîş bêro şênkerdene, a game do hîna rew peynîya ê bîyarê. No tena meseleyê Kurdan nêyo, meseleyê şarê Tirkîya yo zî. Hemverê hişmendîya Erdoganî de ganî xoverdayîş bêro xurtkerdene.”

Polîsanê ke Hêriş Berd serê Mayan, Ma do Înan ra Hesab Bipersê

Mêrdîne bale ante serê mucadeleyê mayan ê xoverdayoxan û vat seba domananê xo yê xoverdayoxan kuçeyan de hemverê dewleta faşîste de tarîx nûsenê. Mêrdîne peynî de nê vatî: “Dîktatoro ke vîneno peynîya ê amîya, mexmela sipî ya mayan ra zî terseno. Polîsê Tirkî bi bêexlaqî hêriş kenê. Polîsê ke hêrişê mayanê ma kenê ganî nê bizanê; ma sey Têgêrayîşê Cinîyan ma do hesabê nê bipersê. Polîsê ke kuçeyan de hemverê mayan de destê xo kenê berz, do keyeyanê xo de zî bi asanî nêkewê ra.”