Bi nizdbîyayîşê weçînitişanê cayîyan partîyan seba nazedan xebatê xo dayî destpêkerdene. Kîşta nê de muracatê seba keyatîye zî dewam kenê. Dêrsim de muracatkerdişê seba keyatîye ya cinîyan bale ancena. Şîlana ke Pulur ra ya zî seba keyatîye muracat kerd. Şîlane vat pîyê ci emser ameyo tepiştene loma aye fikrê seba perwerdeyî şîyayîşê bi Stenbolî ra fek vera dayo û qerar dayo ke dewe de bimano.   

 ‘Ez wazena cinîyan hişmend bikerî‘

Şîlane vat ke eke bibo keyaye do tewr zaf derheqê doman û cinîyan de çîyan bikero û wina vat: “Mi lîseya mesleke de wende, ez beşê pîlbîyayîşê domanan ra mezûn bîya. Tîya mayî rîyê gure û karî ra domanan rê zaf wext nêdanê, seba ke ê bieşkê wext bidê tayê fikrê mi estê. Sere de cinîyanê tîyayî nêwaşt ez bibî namzedê keyatîye, ez wazena cinîyan hişmend bikerî.”

 ‘Gama ez vînena yew ziwanê maya mi qisey keno ez xo nizdê înan hîs kena“

Şîlane qiseykerdişê xo wina domna: “Gama ke ez şina bajar ez xeylî bêrîya adirî kena, bêrîya kokiman kena. Gama ez vînena yew ziwanê maya ma qisey keno ez wazena şirî verê ci û xoşebere bikerî. Wa dewe de rez, baxçe û çend heywanê min ê ke ez pê debarîya xo bikerî estbê mi rê bes o. Ez wazena cayêk ke sîstem hewna tay kewto ci de biciwîyî.”

‘Ma cinîyî ganî sere de xo ra bawer bikerê‘

Şîlane peynî de vat ke aye bawer kena cinîyî eşkenê her wareyî de her karî bikerê û nê vatî: “Cinîyî çîyêk biwazê eşkenê bikerê. Tenya wa xo ra bawer bikerê. Ez tîya her karî kena; kolîyan birnena, hêga de kar kena, heywanan çerênena. Ma cinîyî ganî sere de ma xo ra bawer bikerê. Eke ma bi nê zanayîşî tê bigêrê seba tesdîqê çewî îhtîyacîya ma nêmanena.”