Endama Koordînasyonê Komelgehê Cinîyan ê Azadan ê Rojhelatê Kurdîstanî (KJAR) Peymane Vîyan bi wesîleya serrgêra yewine ya Şorişê Jin, Jiyan, Azadî ANFyî rê qisey kerd.

Qiseykerdişê Peymane Vîyan ra tay noqtayê girîngî wina yê:

''Xoverdayîş û têkoşînê cinîyan serrêke xo pey de verdaye. Na yew serre de bedelê giranî ameyî dayene. Şarê Rojhelatê Kurdîstanî û Îranî îmtîhanêko pîl da û bi zelalî mojna ke ê do azadîya xo bivisnê destî. Qetilkerdişê Jîna Emînî ra dima teqayîşêko pîl qewimîya. Cinîyî bi armancê azadîye vejîyayî waran.

Sîstemê dewleta netewe bi ferasetê pederşahîye waşt ke manaya Jin, Jiyan, Azadî çin bikero. La şorişê Jin, Jiyan, Azadî hîna aver şi. Jin, Jiyan, Azadî sloganêkî ra wetêr bi manaya felsefeya azadîye ya cinîyan û pêro dinya rê vila bi. Nê şorişî de di çîyê girîngî est ê; cinîyî serkêş ê û Rojhelatê Kurdîstanî de no şoriş qewimîya.

Eke Şorişê Jin, Jiyan, Azadî serkêşîya cinîyan de dest pênêkerdêne hende vila zî nêbîyêne. Xora mamostayî, karkerî, ciwanî, hunermendî ûsn tewrê şorişî bîyî. La cinîyan nê şorişî de rolê tewr pîlî ardî ca. Nê şorişî ferasetê komelî vurna. Heta ke azadîye bi temamî bêra destvistene zî no şoriş do dewam bikero. 

Dewleta Îranî kerd ke pê teda û zorbazîye verê nê şorişî bigêra la nêeşkaye. Şaran fam kerd ke eke bivejîyê waran azadîye do bivisnê destî. Bi nê haayî yew kulturê xoverdayîşî zî ame afernayene. Rixmo ke rejîmî pê dardekerdişî tehdît kerd, şar û cinîyan xoverdayîş û têkoşînê xo ra apey gamêke zî nêeşte. Şorişê Jin, Jiyan, Azadî hêvî û bawerîye afernaye. Şaran hêzê xo dî. Şorişê Jin, Jiyan Azadî rixmê teda û zorbazîya dewleta Îranî zî vurîya şorişêkê komelkîyî.

Dewleta Îranî hema zî kena ke pê tehdîtan verê serewedaritişî bigêra. La hînî şarî nêtersenê. Ez pê bawer a ke serrgê Şorişê Jin, Jiyan, Azadî de pêro şarî vejîyê meydanan. Rejîmê Îranî keyeyanê şehîdan tepişeno û bi nê hawayî şaran tehdît keno. Vera ney şarî wa vajê 'Ma pêro keyeyê şehîdan ê.' Mesuldarîya ma ya ke ma wayîrê şehîdan û keyeyanê înan  vejîyê.

Dewleta Îranî Şorişê Jin, Jiyan, Azadî ra dima kerd ke cinîyan ê wendekaran ra qesas bigêra û wendekarî jehrî kerdî, îşkenceyê înan kerd û ê qetil kerdî. La şoriş dewam keno. Çunke no şoriş şorişêkê ferasetî yo zî. Ganî ma serra diyîne ya şorişî de xo hîna zaf rêxistin bikerê, yewîya xo awan bikerê. Cinîyî ganî yew bibê. Ganî cinîyê belûcî, azerî, kurd, ereb û farsî yew cephe de bêrê yewca û têkoşînê xo yew bikerê.

Ganî hînî cinîyî nêverdê ke camêrdî nameyê înan ser o qerar bidê. Seke Rayber Apoyî vatbi heta ke cinîyî azad nêbê komel zî azad nêbeno. Ma no Şorişê Jin, Jiyan, Azadî de dî. Azadîya pêro şaran pabesteyê azadîya cinîyan a. Serra diyîne ya şorişî de zulm û zorbazîya rejîmî çend pîl biba zî ganî xoverdayîş û têkoşînê ma zî hende pîl bibê. Se beno wa bibo têkoşînê ma do dewam bikero.''