Endama Koordînasyonê KJKyî Aytene Dêrsim bi wesîleya serrgêra 45. ya ronîyayîşê PKKyî Medya Haber TVyî rê qisey kerd.

Qiseykerdişê Aytene Dêrsim ra tay noqtayê girîngî wina yê:

''Têgêrayîşê PKKyî têgêrayîşê şehîdan û cinîyan o. Rayberê ma PKKyî wina pênase keno. Rayber Apoyî sey bîyayîşê xo yê diyînî pênase kerd. Tarîxê têkoşînê PKKyî yê 45 serran îsbat kerd ke Kurdîstanî ra vejîya û vilayê pêro dinya bîyo. Ewro pêro dinya dormeyê Rayberê ma de, dormeyê azadîya Rayberê ma de têkoşîn kena.

Têkoşîno ke ewro ma koyanê azadan de kenê zî îsbatê serkewtişê PKKyî yo. Bi serran o gerîlayî vera teknîkanê NATOyî, hêrişanê kîmyewîyan û faşîstan xo ver danê. No ruh ruhê PKKyî yo azad o ke hetê Rayberê ma ra ameyo afernayene. Ganî şar û cinîyî bivînê ke têgêrayîşê ma bi nê têkoşînî hînî bîyo têgêrayîşo global.

Dîyar bi ke şar û cinîyî her ke xo rêxistin kenê do ser bikewê. Her ke xo zanaye kenê ver bi serkewtişî şinê. Her ke xo ver danê azadîye visnenê destî. Bêguman cinîyî cewherê PKKyî yê. Hêzanê emperyalîstan û hegemonîkan tim vatêne ke ê do komelî û cinîyan teslîm bigêrê. Şexsê ma de şexsê têkoşînê ma de ê nêeşkenê ney bikerê. Gama destpêke ya PKKyî de Rayberê ma dî ke cinîyî ganî destpêk de bêrê rêxistinkerdene. Garantîya PKKyî ra yew zî cewherê ci yê cinîyan o. Sey têgêrayîşê cinîyan ê azadan ma rêxistinîya xo destpêk de Kurdîstan de kerde û dima Rojhelatê Mîyanênî ra vila bîye. Ewro cinîyê dinya têgêrayîşê ma yê cinîyan ra îstîfade kenê. Bi taybetî Şorişê Cinîyan ê Rojawanî pêro dinya rê beno çimeyê îlhamî. Seke ma vat rêxistinîya ma hema destpêk de artêşa cinîyan naye ro û artêşa ma derbê giranî dayî dişmenî ro.

Ewro bi mîlyonan cinîyî dormeyê îdeolojîya azadîya cinîyan de xo zanaye kenê. Nîqaşê serê rayîr û metodanê rêxistinîya cinîyan kenê. Bêguman rêxistinîya ma garantîya azadîya şaran a. Wexto ke ma bi PKKyî na game eşte, vera kolonyalîzmî dest pê têkoşînî kerd bedelê giranî zî dayî.

Ganî ma bizanê ke seba têkoşînî bedelê giranî lazim ê. Şexsê cinîyan de yeno waştene ke hişmendî, îrade û exlaqê komelî bêrê çinkerdene. Coka ganî cinîyî xopawitişî xurtêr bikerê. Xopawitiş stratejîya rêxistinîya cinîyan a. Vera serdestîya camêrdan, hacetê bingeyîn xopawitiş o. PKK eşkeno bi sîstemê konfederalîzmê demokratîkî, felsefeya neteweya demokratîke serdestîya camêrdan çin bikero.''