Caputova bîye serekkomara cinî ya Slovakya ya ewilêne

Avûkate Zuzana Caputova weçînitişê tûrê dîyinî yê Serekkomarîye yê Slovakya qezenc kerd. Caputova do bibo serekkomara cinî ya welatî ya ewilêne.

Zuzana Caputova ya ke bi mucadeleyê xo yê hemverê dizdîye yena naskerdene, weçînitişan de se ra 58 ra vêşêrî rayî girewtî, komîserê Ewropa Maros Sefkovîcî yo ke hetê îqtîdarê mewcûdî ra yeno destekkerdene zî sînorê se ra 41’î de rayî girewtî.

Caputova dimayê eşkerabîyayîşê netîceyan ra eşkerayîyêk daye û seba yewîye veng da Slovakyayijan û vat, “Ma dimayê ê çîyanê ke ma resnenê têhet şirê, ma hemkarîye serê menfaatanê xo yê şexsîyan de bigêrê.”

Bê Şuxulnayîşê Ziwanêkê Hêrişkarî Zî Qezenckerdiş Mumkun O

Caputovaya ke çapemenîye rê eşkerayî daye vat, “ame dîyene ke mumkun o populîzmî rê rayîr nêdîyo” û wina dewam kerd “no ramojneno ke kes eşkeno bê ke ziwanêkê agresîfî bişuxulno û bê ke muracatê hêrişkarîyanê şexsîyan bikero zî bawerîya merdiman qezenc bikero.”

Reqîbê aye Sefkovîcî zî binkewtişê xo qebûl kerd û vat, “Ez ro birêze Caputova gêraya û mi a pîroz kerde. Ez aye rê binayêka vilikan şirawena, çunke serekkomara cinî ya Slovakya ya ewilêne nê heq kena.”

Serekkomara newî do 15’ê Hezîrane de bi sondwendişî dest bi gureyî bikero.

Pisporî serkewtişê Caputova bi reaksîyonê aye yê hemverê îqtîdarî ke seba meseleya kişîyayîşê rojnameger Juan Kucîakî û waştîya ci dabi îzah kenê. Rojnamegero ke qalê ci beno gama ke xeberêk derheqê têkilîya sîyasetmedaranê Slovakyayijan û mafyaya Îtalya de viraştêne amebi kiştene.

Huqûqnase Caputova ya 45 serrî, ê wextî nûmayîşanê protestoyî yê ke bi hezaran kesî tewrê ci bîyêne de ca girewtibi.  Dimayê reaksîyonê ke kuçeyan ra bibi berz serekwezîr Robert Fîco mecbûr mendibi ke îstîfa bikero.