Meclîsanê Cinîyan ê HDPyî û Partîya Çep a Keske pare kerd ke ê do weçînayîşanê Serekkomarîye yê 28ê gulane de seba binvistişê 'rejîmê tekcamêrdî' bêrê û venga pêro cinîyan da ke seba awankerdişê cuyêka newîye têbigêrê.
Meclîsanê Cinîyan ê HDPyî û Partîya Çep a Keske derheqê turê diyînî yê weçînayîşê serekkomarîye de eşkerayîyêka hempare daye.
Eşkerayîye bi kilmî wina ya:
''Ma netîceyanê weçînayîşê 14ê gulane de bi 29 wekîlanê cinîyan bîyê partîya ke tewr zaf temsîlîya têdûşte tede est a. Ma bi şîarê 'Ma do cinîyan reyde bivurnê' reyna nêverda ke serdestîya camêrdan ser bikewa. La karê ma yo nêmcet est o! Îtîfaqê Cumhurî yo kolonyalîst bi qiseyanê 'Cinîyê teynayî ganî bêrê weyekerdene' cinîyan komelî ra wetêr keno.
-Ma dişmenê cinîyan xo vîr a nêkerdî!
-Ma bînayê tarî yê dişmenî yê 90an xo vîr a nêkerdî!
-Ma Konca Kurîşa ke ameya qetilkerdene xo vîr a nêkerde!
-Ma cinîyê ke netîceya şîdetê camêrd-dewlete de qetil bîyê xo vîr a nêkerdî!
-Ma betalkerdişê Peymana Îstanbulî xo vîr a nêkerd!
-Ma êyê ke kinc, bawerî û kulturanê cinîyan ser o sîyaset kenê xo vîr a nêkerdî!
-Ma ê qeyûmê ke dezgehê cinîyan qefilnayê û dest nayê destkewteyanê cinîyan ser xo vîr a nêkerdî!
Ma 14ê gulane de faşîzm vindarna; nika zî ma do faşîzmî bin bivisnê.
Ma venga pêro cinîyan danê ke bêrê ma pîya newe ra awan bikerê û 28ê gulane de rejîmê tekcamêrdî bin bivisnê. Bêrê ma pîya şorê sindoqan ser û wayîrê rayanê xo vejîyê! Bêrê reyna ma hêzê cinîyan bimojnê!''
