Semedê wedartişê tecrîdê serê Rayberê Şarê Kurdî Abdullah Ocalanî  grevê vêşanîye ke ameyî destpêkerdene bi mangan o ke dewam kenê. Grevê vêşanîye 1’Adare de heme zînandana ra vila bîyî û 15 xoverdayoxan zî 30’ê Nîsane de çalakîya xo açarnaye rojeyê mergî.

Hayrîye Demîra ke 3 qijê aye zîndanan de yê derheqê grevê vêşanîye yê bêdem-bêagêrayîşî de qisey kerd. Demîre vist vîrî ke aye emrê xo vernîya berê zîndanan de ravêrnayo û va: ‘‘Pî û mêrdeyê mi bi îşkence merdî û ez semedê qijanê xo qesewet kena. Kênaya mi 15 serrî  ceza girwete 10 serrî yo zîndan de ya. Yew lajê mi 36 serrî ceza girwete û 26 serrî yo zîndan de yo û lajê mi yo bîn zî 6 serrî û nêm ceza girewte. Nika ez her çîyî ra verê semedê qijanê xo xover dana.

Lajê mi Dînar Demîr Zîndanê Amedî yê Tîpê D’yî de 67 rojî yo ke grevê vêşanîye de yo. Ez çend rojî cuwa ver şîya mi lajê xo û embazê ci dîyî, tepişteyî zaf bîyî, zehîf. Xoverdayoxê ke grûba verêne de yê halê înan hîna giran o. Gama ke ez lajê xo û embazanê ci wîna vînena zerrîya mi vêşena. Xoverdayoxî semedê bêvengîya teberî bihêrs ê. Ma ganî bibo vêngê înan. Ma semedê qijanê xo çirey nêvendene. Wa ne dayîka Kurde ne zî dayîka Tirke meberme. Ma aşitî wazenê. Eke çîyêk qijanê ma bibo qet manaya cuyeya ma nêmaneno. Wa hînî zîndanan ra tabût mevejîyo. Wa zerrîya dayîkan mevêşo. Wezîrîya Edelatî û welatê Ewropa wa goş bidê vengê ma. Wa qijê ma memirê. Wa her kes xo bikero herinda ma. Peynîya ci senî beno wa bibo, do qijê ma ser bikewê. Wa Leyla Guvene biciwîyo. Senî ke ma her tim vanê  xoverdayîş cuye yo.‘‘