Girewteyan ra yew o ke 1’ê Adare ra nata vera tecrîdkerdişê Rayberê Şarê Kurdî Abdullah Ocalanî grevê vêşanîye de yo, Omer Tolûk o.

Tolûko ke qezaya Ceyhanî ya Edene de ameyo dinya, 3 serrî verê cû Ceyhan de dimayê pîrozkerdişê Newroze amebi tewqîfkerdene. Tolûko ke 5 serrî ceza ci rê ameya birnayene, grevê vêşanîye de yo. Dayîka Tolûkî  Meryem Tolûke ard ziwan, înan 30 serrî verê cû Sêrtî ra koçê bi Ceyhanî kerdo û vat, “O wext zî zextê dewlete vera ma zêde bi. 30 serrî yo keyeyê ma tîya yo.

Lajê mi Omer zî tîya de ame dinya û bi pîl. Ciwanêko aram û bêveng bi. Serra 2016 de Newroz  a ke do biameyêne pîozkerdene deqaya peyêne de ameye betalkerdene. Ey û çend hevalanê ci vat, ‘No roşanê ma yo, ma kesî ra destûr nêwazenê. Ma do pîroz bikerê’. Ewro zî sey a roje seba ke çîyêko şaş esto, coka lajê mi dest bi xoverdayîşî kerdo.”

Girewteyî bêvengîye ra razî nîyê

Tolûke qalê pêvînayîşo ke reya peyêne lajê xo reyde kerdo kerd û vat, “Rewşa ey mi rê baş nêasaye. Labelê rewşa hevalanê Omerî xirabêr bîye. 100 rojan ra zêde yo hevalê ey grevê vêşanîye de yê. Goreyê vatişanê înan, şeker û sole nêdanê înan. Tena doktorî şawenê. Ê zî wezîfeyê xo kenê, la bêvengîya merdimanê teberî ra razî nîyê.”

Tolûke serweşîye keyeyanê çalakwananê ke şehîd bîyê rê waşte û vat, “Ma dayîk ê. Xeylî zor o ke merdim zano ê vêşan ê,  înanê ke nêdîyo ney fam nêkenê. Ê bi qerardarîye çalakîya xo dewam kenê. Heta ke tecrîd nêro wedaritene ê do çalakîya xo nêqedênê. O wext, ma yê ke teber de, heta tecrîd bêro wedaritene ganî ma têkoşînê xo xurt bikerê. Bedelê nê çi beno wa bibo ganî ma bikerê ke tecrîd bêro wedaritene. Bi bêvengîye nêbeno, ganî ma vengê xo berz bikerê.”