Grevê vêşanîye yê Leyla Guvene kewt roja xo ya 87’ine. Leyla Guvene seba ke tecrîdê serê Rayberê Şarê Kurdî Abdullah Ocalanî bêro wedaritene, dest bi grevê vêşanîye kerdibi û 25’ê Çele de serbest ameyebî veradayene la Guvene çalakîya xo keyeyê xo de domnena.

Însîyatîfê Dayîkanê Haştîye ra Bedîa Gokyuze, Perîhan Akbulute û Guler Bugdaye, grevê vêşanîye û tecrîd ercna.

DEWLETE KENA KE ÇALAKÎYAN PUÇ BIKERO

Gokyuze 6 serrî yo ke zereyê însîyatîfî de ya û vana 6 serrî yo ke ez şahadîya grevanê vêşanîye kena. Gokyuze wina qisey kerd: “ Na dewlete her tim senî ke xelate daya ma tê gêrena. Seba ke grevanê vêşanîye puç bikero Leyla Guvene hepisxane ra vete. No hende erzan nîyo û domanê ma zî handê asan nênê xapitene. Tayê wîjdan lazim o. Grevê vêşanîye girêdayîyê tecrîdî yê û tecrîd ke bêro wedaritene grevî zî qedînê. Nê merdimî seba çareserîye kewtê çalakîye û bedel danê. NY û CPT zî nê problemî çareser nêkenê. CPT ke seba heqanê merdiman esto, o wext ganî seba Ocalanî zî bibo.“

TALEBÊ LEYLA TALEBÊ MA YÊ

Dayîka Haştîye Akbulute zî wina qisey kerd: “Ma seba ke dayîkî meberbê û merdimî nêmirê, haştîye pawenîme. Tecrîd teberê merdimahîye de yo. Bi haştîye çareserîye yena. Tecrîd merg o. Talebê Leyla ê ma pêroyînan ê. Talebê aye, çar parçe Kurdîstan de, waştişê pêro Kurdan ê. Ganî ma Kurdî zî bême têhet û bibîme yew. Gonîya domananê ma ser TRT 6 ame akerdene. Tayê Kurdî ganî menfaatê xo yê şexsîyî ra dot, yewbîyayîya Kurdan esas bigîrê. Domananê ma bedenê xo grevê vêşanîye de fîstî ra. Ganî ma zî xoverdayîşê înan rê wayîrîye bikîme. Ganî her kes bivejîyo meydanan û vengê xo bikero berz.“

TECRÎD ŞER O

Dayîkanê Haştîye ra Bugdaye zî va qet yew bawerî û exlaq de cayê tecrîdî çin o û wina dewam kerd: “Dost zî dişmen zî baş zano ke, eke yew rayber ke bêro tecrîdkerdene, şexsê ey de pêro şarê ey yeno tecrîdkerdene. No seba kedkar û cinîyan zî yeno manaya tecrîdî. Cinîyî zereyê sîstemî de sey koleyan bîyî. Saya Ocalanî bîyî azad û Leyla Guvene zî ê cinîyan ra yew a. Guvene zî dayîk a û grevê vêşanîye de karê ci yo şexsî çin o. Tecrîd beno sebebê îstiranê dayîkan û ganî derhal bêro wedaritene. Kîlîdê çareserîye Îmralî de yo.“