Grevê vêşanîye yê ke rayberîya Leyla Guvene de dest pêkerdî û 1’ê Adera ra heme zîndanan ra vila bîyî dewam kenê. Nê çalakwanan ra yew zî Mazlûm Teke yo. Teke 1’ê Adare ra nate Zîndanê Amedî de grevê vêşanîye yê bêdem-bêagêrayîşî de yo. Dayîka Mazlûm Tekeyî û temlîskara Komara Ozgur Halkî ya Amedî Nesrîn Teke ya ke serra 2000’î de vera tecrîdî bedenê xo tafîna, Nezahat Teke derheqê grevê vêşanîye de qisey kerd.

Dayîke Teke va: ‘‘Domanê ma semedê wedartişê tecrîdî bedenê xo dayê verê merdişî. Waştişê domananê ma biheq ê. Heme zîndanan de tecrîd û zext esto.  La tecrîdê Îmraliyî her roje hîna xorî beno. Eke tecrîdê Îmraliyî biqêdîyo heme zîndanan de zî rewşe normal bena. Ma sey dayîkê tepişteyan qesawet kenê. Se beno wa bibo dayîyêk nêwazena dejê domananê xo bianco. Ma dejê ewladî zaf hol zanê. Seke xebera Mazlûmî ameye, kênaya mi Nesrîne ameye vîrê mi, zerrîya mi recifyaye. Ez nêwazena yewna domanê xo vînî bikerî. Domanê ma dewaya xo de biheq ê. Kêynaya mi Nesrîne çalakî ra dima gama ke nêweşxane de bî, va, ‘Yew ganê mi esto ey zî ez rayberîya xo rê feda kena‘ mengêk dima ra zî cuya xo vînî kerde. Ez dejê zerrîye zana, wa dayîkê binî meancê.‘‘

Dayîke Teke ard ziwan ke aye çend rojî cuwa ver lajê xo zîyaret kerd û derheqê xoverdayoxan de nê vatî: ‘‘Lajê mi û embazê ey zehîf bîyî. Ê çend vajî ma hol ê zî ma dayîkî vînenê û hîs kenê ke o halê înan zaf xirab o. Wexto ke lajê mi qisey kerdêne destê ey recifyayêne. Naye mi ser o zaf tesîr kerd. Her pêvînayîş de lajê mi vano, ‘Waştişê ma wedartişê tecrîdî yo. Eke ma wirzê lingan ser do tecrîd bêro qedînayene. Se beno wa bibo ma biqerar ê.‘ Wezîrîya Edeletî ganî goreyê qanûnî tê bigêro û tecrîdî wedaro. Wa her kes vengê xo vejo  ke kes memiro. Wa tecrîdê serê Rayber Apoyî wedarîyo. Eke tecrîd wedarîyo aşitî û huzûr yenê na herre. Eke tecrîd xorî bibo kaos û şer hîna gird beno. 7 ganan semedê Rayber Apoyî xo feda kerd. Wa her kes wirzo lingan ser ke hinî kes memiro. Hende bêvengîye bes a. Ma  pêro pîya bibê vengê tepişteyan.‘‘