Dayîkî: Heta ke tecrîd nêro wedaritene ma kuçeyan de yê

Keyeyê girewteyan ê ke vera tecrîdê serê Ocalanî grevê vêşanîye de yê, reaksîyon da şîdetê polîsan û vat, heta ke tecrîd nêro wedarite ma do kuçeyan de bê.

Keyeyê girewteyan seba ke bale biancê serê grevê vêşanîye û rojeyê mergî yê seba wedaritşê tecrîdê girankerdeyî yê serê Rayberê Şarê Kurdî Abdullah Ocalanî bi hewteyan o  kuçeyan de yê.

Keyeyê girewteyan ê Amedî yê ke vengdayîşê seferberîye kenê, bi hawayêkê sîstematîkî rastê terorê polîsan yenê. Dayîkê girewteyan  vernîya Beşê TÛAY-DER’î yê Amedî de ameyî têhet û seba  proterstokerdişê şîdetê polîsan ê vera dayîkan çalakîya roniştişî viraşte.

Dayîke Ayten Gula ke  roja Pancşeme Parka Koşûyolu de polîsan a derb kerde ard ziwan, seba ke waştişê domananê  înan bêrê bi caardene ê çalakîye de yê. Gule vat: “Domanê ma mirenê. La ma ameyî derbkerdene, erd ra ameyî kaşkerdene. Seba ma çareyêk bivînê. Heta çareyêk nêro dîyayene ma do keçeyan de bê.”

Dayîkanê girewteyan ra Garîp Pehlîvane, dayîkanê bînan ra paştdayîş waşt û vat, “Domanê ma kewtê rojeyê mergî. Domanê ma seba şarê Kurdî, seba şarê Tirkîya bedenê xo danê verê merdişî.”Pehlîvane dewamê qiseykerdişê xo de vat, “Wa Hukmat û Wezaretê Edaletî  goşanê xo akerê; ma do naye qebûl nêkerê. Heta waştişê domananê ma nêrê bi caardene, tecrîd nêro wedaritene ma do 24 saetî kuçeyan de bê.”

Dayîkan eşkerayîye ra dima bi slogananê “Biciwîyo Xoverdayîşê Zîndanan” û “Amed  nêkewe ra, rûmetanê xo rê wayîr bivejîye” çalakîya xo qedênaye.