Endama Koordînasyonê PAJK’î Delal Nurhake Stêrk TV’yî de beşdarê programê Rojeva Jinê (rojdemê cinîyan) bîye û rojdem ercna.  Nurhake bale ante weçînayîşî ser û wina va: “Teda û zordarîya faşîzmê AKP-MHP’yî her wextî ra hîna zêde ameyî kerdene, la HDP’yî vera nê tedayan hîna zêde xo ver da û mîtîngê xo kerdî. No weçînayîş bi hawayê serkewteyî derbaz bi. Îtîfaqê Cumhurî nê weçînayîşî de derbêka girane girewte û rijîya.

Îtîfaqê faşîstî yê AKP-MHP’yî weçînayîş de waşt ke erdê Kurdistanî bombarduman bikero, şoro Rojawanî ser û Vakûrê Kurdistanî de bi operasyonê qirkerdişî yê sîyasîyî Kurdan çin bikero û bi nê qeydeyî kerd ke Kurdan ra biters rayan bigîro.

Nê hêriş û tedayan ver şarê ma 31’ê Adare de bi coşêkê pîlî şi sindoqan ser û cewab da faşîzmê AKP-MHP’yî. Tena Kurdistan de nê, pêroyê Tirkîya de, bi reaksîyonêkê demokratîkî cewab da îqtîdarê faşîstî. Şirnex de polis û leşkeran rê rayî dayî eştene û Botan de polîtîkaya taybete naye ro. Şarê ma yê Botanî zî cewab da nê polîtîkayan.”

Eke problemê cinî û domanan çareser bibo, problemê komelî zî do çareser bibo

Nurhake derheqê sîstemê hemserekîye de zî wina va: “Şaredarîyan de sîstemê hemserekîye ameyo roniştene û hetê şarî ra ameyo qebulkerdene. Sîstemê faşîstî her ca de hêrişê serê sîstemê hemserekîye kerd, bi seyan cinîyî, hemserekî îxrac kerdî û cayê înan de karmendê xo tayîn kerdî. Bi seyan cinîyî eştî hepisxane, îxrac kerdî la bi seyan cinîyî zî beşdarê xebatan bîyî û sîstemê hemserekîye de cayê xo girewt. Profîlê cinîya azade vejîya meydan.

Cinîyî êdî sey verî nîyê, vera teda û zordarîye vindenê û rolê xo yê tarîxîyî anê ca. Êdî cinîyî polîtîkaya şar û komelî anê ca. Hemserekê cinîyî, ganî projeyanê demokratîk û ekolojîkan bidê xo ver û bi çarçewaya komunalî verê komelî a bikerê. Sîstemê nikayî de problemê cinî û domanan zaf ê, ganî no derheq de projeyî bêrê viraştene. Çunke eke problemê cinî û domanan çareser bibê, o wext problemê pêroyê komelî do bêrê çareserkerdene

Ma embaza Yonca û embaz Siraçî yê ke çalakîya fedaîyîye kerda silam kenê. Şexsê Leyla Guvene de, çalakîyê grevê vêşanîye bi hawayê pêtî dewam kenê û nê grevê vêşanîye bi xo, çalakîyê fedaîye yê xora. No 5 mengî yo ke grevê vêşanîye dewam kenê û vera faşîzmî xoverdayîş yeno dayene. Ganî şarê ma paştdarîye bido nê çalakîyan.”

Nurhake peynîya qiseykerdişê xo de derheqê rojbîyayîşê Rayberê Şarê Kurdî Abdullah Ocalanî yê 4’ê Nîsane de wina va: “Ez 4’ê Nîsane yê Rayber Apo û pêroyê şaran pîroz kena. 4’ê Nîsane rojbîyayîşê cinîya azade yo. Cinîya Kurde xo bi Rayber Apoyî newe ra nas kerd.”