Organîzasyonê cinîyan ê herêma Cizîre ya Vakurê Sûrîye menga Kanûne ya 2016î de dest bi awankerdişê dewa cinîyan a bi nameyê Jinwarî kerdibi, aye temam kerde. Dewe do 25ê Teşrîna peyêne de bireso roniştoxanê xo.

Dewe de kîşta 30 keyeyan de, Dibistana Maye Uveyşe, Akademîya Jinwarî, muzeyêk û ocaxa weşîye zî estê. Nameyê maya Rayberê Şarê Kurdî Abdullah Ocalanî (Uveyş) dîyayo dibistane wa.    

Çira Jinwar?

Pawitişanê Rayberê Şarê Kurdî Abdullah Ocalanî de bale ancîyena homaye Îştare û cinîya ke qîmê xo bi xo ana û fikrê awankerdişê dewa Jinwarî nê ra yeno.

Verê awankerdişê dewe xeylî muhendîs û organîzasyonanê cinîyan dir pêvînayîşî ameyê viraştene. Netîce de qerar dîyayo ke heme 30 keyeyê dewe zî herrî ra bêrê viraştene.  

Vernî de kam eşkeno dewe de bimano?

Seba dewe de ciwîyayîşî vernî de ca dîyeno keyeyanê seba azadîya Vakurê Sûrîye şehîd kewtê. Cinîyê vîyayî û yê bêkesî zî eşkenê seba dewe de mendişî muracatê Kongreya Starî yan zî Keyeyê Cinî rê bikerê. 

Dewe de her çî hempar o

Dewa ke nika tede 8 keyeyî bica bîyê de cuya hempare yena esasgirewtene. Wextê arayî û şamîyan ê dewe hempar ê. Roniştoxanê dewe ra Fatma Derwîşa 37 serrî ke maya 7 domanan a vat: “Dimayo ke mêrdeyê mi şer de şehîd kewt mi tengeya debarîye ante. Naye ra mi muracatê Keyeyê Cinî kerd û hetkarîye waste. Înan mi rê pêşnîyazê Jinwarî de mendişî kerd mi zî qebûl kerd. Seba ke ez amîya tîya ez kêfweş a. Cinîyî her çîyî de pîya yê û yewbînan temamkerdişî esas gênê.”

Yewna cinîya ke dimayê şehadetê mêrdeyê xo ra Jinwarî de bica bîya zî Fatma Emîn a. A zî kêfweşîya xo ya ravêrtişê bi Jinwarî ana ziwan.

Komîteya awankerdişê dewe de yewe zî Almane esta

Komîteya awankerdişê dewe de kesêka balkêşe esta, Nûjîn Alman. Nûjine Alman a û seba awankerdişê înan ê dewe wina qisey kerd: “Amacê ma o yo ke cinî qîmê xo bi xo biyaro û cuyêka komunale ke rengê cinî ser o serdest o bêro awankerdene.”